47:405  405  CAPUT  XVIII.  406  aliquod  sibi  regnum  vindicare,  Christus  tamen  hoc  idem  nunc  certius  affirmat:  nec  eo  contentus  alteram  sententiam  subiicit,  quae  sit  veluti  illius  dicti  obsignatio.  Unde  colligimus,  doctrinam  de  regno  Christi  non  vulgarem  esse,  quum  tanta  asseveratione  dignam  ipse  duxerit.  Est  quidem  generalis  sententia,  ego  in  hoc  natus  sum,  ut  testimonium  reddam  veritati,  praesertim  tamen  ad  loci  huius  circumstantiam  aptanda  est.  Caeterum  hoc  sonant  verba,  Christo  esse  naturale  ut  sit  verax:  deinde  in  hoc  a  patre  esse  missum,  ideoque  proprium  esse  eius  munus.  Quare  non  est  periculum,  ne  illi  credendo  fallamur,  quandoquidem  impossibile  est,  eum  aliud  quam  verum  tradere,  cui  munus  asserendae  veritatis  divinitus  attributum  est  et  studium  natura  ingenitum.  Quisquis  est  ex  veritate.  Hoc  addidit  Christus  non  tam  hortandi  Pilati  causa,  quod  se  nullo  profectu  facturum  esse  sciebat,  quam  ut  suam  doctrinam  ab  indignis  contumeliis,  quibus  subiecta  erat,  vindicaret,  ac  si  dixisset:  Crimini  hoc  mihi  ducitur,  quod  me  professus  sim  esse  regem:  atqui  haec  indubia  est  veritas,  quam  reverenter  et  sine  controversia  excipiunt  quicunque  sunt  recto  iudicio  sanaque  intelligentia  praediti.  Quanquam  ex  veritate  eos  esse  dicit,  non  qui  naturaliter  verum  perspiciunt,  sed  quatenus  spiritu  Dei  reguntur.  38.  Quid  est  veritas?  Quibusdam  videtur  Pilatus  curiose  inquirere,  ut  solent  interdum  profani  homines  cupide  appetere  ignotae  rei  scientiam,  interea  nescientes  cur  hoc  velint.  Illis  enim  tantum  propositum  est  aures  suas  pascere.  Ego  vero  potius  vocem  esse  fastidientis  interpretor.  Putabat  enim  sibi  non  parum  iniuriae  fieri  Pilatus,  quod  eum  Christus  omni  veritatis  notitia  privaret.  Iam  in  Pilato  agnoscimus  communem  hominum  morbum.  Quamvis  ignorantiae  conscii  nobis  simus  omnes,  pauci  tamen  sunt  qui  fateri  sustineant.  Hinc  fit  ut  veram  doctrinam  maior  pars  respuat.  Postea  Dominus,  qui  doctor  est  humilium,  superbos  excaecando  quam  merentur  poenam  ipsis  infligit.  Ex  eadem  superbia  nascitur  fastidium  illud,  quod  se  ad  discendum  submittere  non  dignantur,  quia  sibi  perspicaciam  et  acumen  ingenii  omnes  arrogant.  Res  creditur  trita  esse  veritas  :  Deus  autem  contra  testatur  captu  humanae  mentis  longe  altiorem.  Idem  in  aliis  quoque  accidit.  Praecipua  theologiae  capita  sunt,  de  maledictione  generis  humani,  de  corrupta  natura,  de  mortificatione  carnis,  de  renovatione  vitae,  de  reconciliatione  gratuita  per  unicum  sacrificium,  de  iustitiae  imputatione,  qua  acceptus  est  Deo  peccator,  de  illuminatione  spiritus:  haec,  quia  sunt  paradoxa,  communis  hominum  sensus  contemptim  repudiat.  Pauci  ergo  in  Dei  schola  proficiunt,  quia  vix  decimus  quisque  reperitur  qui  ad  prima  rudimenta  attendat.  Cur  autem,  nisi  quia  proprio