9:404  omnia  captantem  urget?  Tu  stas  ad  tribunal  pii  magistratus,  reus  ob  exsecrandas  blasphemias:  ut  te  explices,  nos  in  Cerdonis  partes  pertrahere  conaris.  Eadem  etiam  petulantia  erumpit  in  Archonticis  :  quasi  in  hac  ecclesia,  ubi  sub  specie  ovis  fuisti  lupus  et  vulpes  simul,  audieris  angelos  praedicari  mundi  creatores.  Eodem  etiam  redit  proxima  quaestio,  quae  eadem  est:  An  neget  Calvinus  unicum  Deum  Israel  esse  patrem  verbi.  Tu  vero  sycophanta  satis  superque  tenes,  quid  tibi  etiam  nuper  nobis  audientibus  dixerit.  Pridem  vero  tenere  debueras  quid  coram  toto  mundo  praedicent  eius  scripta,  et  quid  apud  populum  quotidie  doceat.  Apage  ergo  cum  tuis  probationibus.  Sed  interea,  ut  scias  te  hominem  esse  phreneticum,  imo  daemoniacum,  memoria  repetas  quod  nuper  diximus:  Quia  [pag.  77]  synonyma  non  sunt  pater  Christi,  et  Deus  Israel,  sententiam  non  posse  converti,  ut  filio  excluso  deitas  restringatur  ad  solum  patrem.  Nec  verbis  digna  est  illa  canina  improbitas,  quum  principium  illud  sumis,  Deum  non  posse  invocari  sine  mediatore.  Hoc  etiam,  nisi  plus  quam  turpiter  ingratus  esses,  debueras  acceptum  referre  Calvino,  Deum  non  exaudire  preces  nostras  nisi  per  mediatorem.  Quid  postulas  ut  tibi  clare  respondeat  hac  de  re,  quam  toti  mundo  sonore  testatus  est?  Nisi  te  possideret  Satan,  certe  in  istam  petulantiam  non  erumperes.  Tergiversationem  vocas  quod  scripserat  Calvinus  docendi  tui  causa.  Si  quaeritur  annon  tutior  precandi  forma  sit,  dum  invocamus  patrem  in  nomine  filii:  respondemus,  sicut  iam  diximus,  hanc  esse  ordinariam  et  magis  familiarem,  quia  aptior  est  ruditati  nostrae  et  utilior.  Sed  alias  formas,  quae  etiam  in  usu  fuerunt  apostolis,  et  quas  illis  spiritus  sanctus  dictavit,  damnare,  sacrilegae  temeritatis  esset.  Nec  valet  illa  obiectio  :  Frustra  Deum  invocari  absque  mediatore:  quia  etsi  fixum  est  illud  principium,  non  exaudiri  nos  nisi  per  gratiam  mediatoris,  non  tamen  semper  in  promptu  occurrere  necesse  est.  Iam  praeteriit  annus  ex  quo  scriptum  hoc  cum  tuis  condiscipulis  legisti  :  et  adhuc  discendi  studium  simulas,  quasi  diabolus  in  Christi  schola  velit  proficere.  Haec  nobis  extorsit  foetida  illa  tua  eructatio.  Iam  tibi  [pag.  78]  de  re  simpliciter  respondemus  :  Mediator  fuit  Christus,  ut  Deus  manifestatus  in  carne.  Neque  enim  homo,  nisi  simul  Deus  esset,  perduceret  nos  ad  Deum.  Fatemur  quidem  humanae  naturae  respectu  Christum  nobis  esse  mediatorem,  quatenus  advocatus  est  noster,  et  apud  patrem  pro  nobis  intercedit:  sed  utramque  naturam  comprehendi  necesse  est,  ubi  de  mediatore  agitur.  Proinde  quod  infers,  nefas  esse  vocare  Christum  mediatorem,  ut  est  Deus,  prorsus  est  diabolicum.  Maior  etiam  insulsitas  in  eo  quod  proxime  sequitur:  Si  mediator  fuit  quatenus  filius,  Deum  Israel  esse  eius  patrem  sine  personae  respectu.