8:404  persecution,  laquelle  nous  n'aurons  point  attendue,  survient,  nous  ne  soyons  point  surprins  au  despourveu.  Mais  ie  crain  bien  qu'il  n'y  ait  beaucoup  d'oreilles  sourdes  a  ouir  ce  propos.  Tant  s'en  fault  que  ceulx  qui  sont  cois  et  a  leur  aise,  se  preparent  a  souffrir  la  mort  quand  besoing  sera,  qu'il  ne  leur  chault  de  servir  a  Dieu  en  vivant.  Si  est-ce  neantmoins  que  ce  debvroit  estre  nostre  estude  ordinaire,  et  sur  tout  au  temps  auquel  nous  sommes.  Cependant,  ceulx  que  Dieu  appelle  a  souffrir  pour  le  tesmoignage  de  son  nom,  doibvent  monstrer  par  effect  qu'ils  ont  este  duicts  de  longue  main  a  s'y  porter  constamment.  Et  alors  ils  doibvent  reduire  en  memoire  toutes  les  exhortations  qu'ils  ont  ouyes  le  temps  passe,  comme  si  un  gendarme  prenoit  les  armes  quand  la  trompette  sonne.  Mais  quoy?  Il  n'est  question  que  de  cercher  subterfuges  pour  eschapper,  ie  di  quant  a  la  plus  part;  car  la  persecution  est  bien  une  vraye  touche  par  laquelle  Dieu  descouvre  quels  sont  les  siens.  Tant  y  a  qu'il  ne  s'en  trouve  gueres  qui  luy  soyent  fideles  iusques  a  se  presenter  franchement  a  la  mort.  Or  c'est  quasi  une  chose  incroyable,  que  gens  qui  se  glorifient  d'avoir  entendu  quelque  peu  en  l'Evangile,  osent  ouvrir  la  bouche  pour  user  de  telles  cavillations.  Les  uns  diront:  Que  gaignons-nous  de  confesser  nostre  foy  a  gens  obstinez  et  qui  ont  delibere  de  batailler  contre  Dieu?  n'est-ce  pas  semer  les  pierres  precieuses  devant  les  porceaux?  (Marc.  8,  38.)  Comme  si  Iesus  Christ  n'avoit  point  declare  notamment  qu'il  veult  qu'on  le  confesse  entre  les  plus  pervers  et  malings.  S'ils  n'en  sont  edifiez,  pour  le  moins  si  demeureront-ils  confus.  Tant  y  a  que  la  confession  est  de  bonne  odeur  devant  Dieu,  combien  qu'elle  soit  mortelle  aux  reprouvez.  Il  s'en  trouve  qui  disent:  De  quoy  nostre  mort  proufitera-elle?  plustost  elle  tournera  en  scandale.  Comme  si  Dieu  leur  avoit  laisse  le  chois  de  mourir  quand  bon  leur  semblera,  et  quand  ils  voiront  le  temps  opportun.  Au  contraire,  [f.  34]  nous  approuvons  nostre  obeissance,  luy  laissant  en  sa  main  le  proufit  qui  doibt  revenir  de  nostre  mort.  Parquoy,  en  premier  lieu,  il  fault  que  l'homme  Chrestien,  quelque  part  qu'il  soit,  nonobstant  les  dangers  ou  menaces,  advise  de  cheminer  en  simplicite,  comme  Dieu  luy  commande.  Qu'il  se  garde  tant  qu'il  pourra  de  la  rage  des  loups:  mais  que  ce  ne  soit  point  avec  une  astuce  charnelle.  Sur  tout,  qu'il  remette  sa  vie  entre  les  mains  de  Dieu.  A-il  fait  cela?  S'il  advient  qu'il  tombe  entre  les  mains  des  ennemis,  qu'il  pense  que  Dieu,  l'ayant  la  amene,  le  veult  avoir  pour  l'un  des  tesmoings  de  son  Fils,  et  pourtant,  qu'il  n'y  a  moyen  de  reculer,  sinon  en  faulsant  la  foy  a  celuy  auquel  nous  avons  promis  tout  debvoir  a  vivre  et  a  mourir,  et  auquel  nous  sommes  et  appartenons,  encores