54:404  nous  ne  parvenions  au  fruict  et  a  la  iouissance  des  choses  qu'il  nous  promet  auiourd'huy,  et  que  nous  esperons.  Et  cependant,  que  nous  glorifions  nostre  Dieu  en  ce  qu'il  nous  a  fait  plus  de  bien  qu'aux  peres  sous  la  Loy:  puis  qu'il  nous  a  preferez  a  eux:  en  ce  qu'il  nous  a  donne  plus  ample  declaration  de  sa  volonte  et  des  promesses  de  nostre  salut,  que  nous  venions  a  luy  d'un  tant  meilleur  courage,  et  que  nous  y  adherions  d'une  affection  plus  ardente,  iusqu'a  ce  qu'il  nous  retire  en  son  Royaume  celeste,  ou  nous  verrons  en  pleine  perfection  les  choses  que  nous  contemplons  maintenant  par  foy.  Or  nous-nous  prosternerons  devant  la  face  de  nostre  bon  Dieu,  etc.  TROISIEME  SERMON.  Chap.  I,  v.  1.5.  Il  n'y  a  plus  de  ceste  salutation  de  sainct  Paul  autre  chose  a  exposer,  sinon  qu'il  appelle  Tite  son  vray  fils  selon  la  foy  commune  :  et  puis  il  demande  a  Dieu  qu'il  luy  face  grace  et  misericorde,  et  luy  donne  paix.  Or  il  est  vray  qu'il  nous  est  defendu  d'avoir  nul  pere  en  ce  monde:  mais  cela  s'entend  que  nous  ne  devons  point  nous  arrester  a  la  creature  pour  despouiller  Dieu  de  son  honneur:  car  il  faut  que  tout  parentage  se  rapporte  la,  comme  aussi  il  en  procede.  Mesme  cele  n'est  pas  seulement  selon  l'esprit,  mais  en  tout  et  par  tout  il  faut  que  Dieu  soit  recognu  et  honore  pour  Pere  unique.  Il  est  vray  que  l'Apostre  en  l'Epistre  aux  Hebrieux  declare  qu'il  est  Pere  de  nos  ames,  et  fait  comparaison  de  luy  avec  les  peres  charnels:  mais  tant  y  a  que  selon  nos  corps  il  faut  bien  aussi  que  Dieu  soit  nostre  Pere.  Car  combien  que  nous  soyons  engendrez  par  nos  peres  terriens  selon  nature,  si  est-ce  que  Dieu  nous  a  formez  et  creez.  Et  c'est  un  miracle  qui  merite  bien  d'estre  renomme  que  celuy-la,  quand  Dieu  cree  une  telle  creature  qu'est  l'homme,  de  ce  qu'il  luy  donne  une  telle  forme.  La  donc  Dieu  desploye  une  belle  sagesse,  voire  et  telle  que  nos  corps  sont  des  miroirs  ausquels  nous  devons  contempler  son  ouvrage.  Et  ainsi  (comme  i'ay  desia  touche)  Dieu  sera  Pere  des  corps  aussi  bien  comme  des  ames,  mais  sur  tout  il  veut  estre  nostre  Pere  spirituel.  Au  reste,  cela  n'empesche  point  que  ceux  qui  nous  engendrent  par  la  parole  de  Dieu,  ne  soyent  aussi  estimez  peres  sous  luy  en  degre  inferieur.  Voila  donc  Dieu  qui  demeure  tousiours  en  sa  principaute  souveraine,  et  n'ha  point  de  compagnon:  car  il  n'y  a  homme  mortel  qui  se  puisse  egaler  a  luy:  mais  d'autant  qu'il  luy  plaist  user  des  hommes  mortels,  et  les  faire  instrumens  pour  nous  engendrer  en  la  vie  celeste,  voire  de  ceste  semence  incorruptible  (comme  sainct  Pierre  la  nomme),  c'est  ascavoir  la  doctrine  de  l'Evangile,  ceux  qui  sont  constituez  pour  prescher  sa  parole,  sont  nos  peres.  Sainct  Paul  donc  n'a  point  ici  usurpe  ce  qui  estoit  propre  a  Dieu,  mais  il  s'est  nomme  pere  de  Tito,  d'autant  qu'il  l'avoit  engendre  en  la  foy  Chrestienne.  Or  tant  s'en  faut  que  cela  obscurcisse  l'honneur  et  la  dignite  de  Dieu,  que  plustost  c'en  est  une  approbation.  Car  si  les  hommes  qui  nous  apportent  la  doctrine  de  salut  pour  nos  ames,  sont  nos  Peres,  que  sera-ce  de  celuy  qui  nous  l'envoye,  et  qui  est  le  vray  autheur,  et  qui  fait  servir  le  labeur  des  hommes  comme  bon  luy  semble?  Quand  il  donne  la  faculte  et  le  moyen,  qu'il  donne  la  vertu  a.  la  doctrine  afin  qu'elle  nous  profite,  quand  (di-ie)  Dieu  besongne  en  telle  sorte,  que  c'est  luy  qui  commence  et  qui  parfait  le  tout,  la  gloire  ne  luy  en  doit-elle  point  estre  rendue?  Comme  quand  il  est  dit  que  les  ministres  de  la  parole  pardonnent  les  pechez,  qu'ils  deslient  les  ames,  ce  n'est  pas  que  Dieu  leur  ait  resigne  son  office,  et  qu'il  s'en  soit  desvestu:  mais  quand  il  leur  a  commis  sa  parole,  il  leur  a  aussi  declare  a  quelle  fin  elle  doit  estre  preschee,  et  quel  est  cest  office:  car  ceux  qui  recoyvent  les  promesses  que  nous  offrons  au  nom  de  Dieu,  doyvent  estre  certifiez  que  tout  ce  que  nous  avons  presche  est  advoue  au  royaume  des  cieux:  car  nous  les  avons  renvoyez  a  Dieu  qui  nous  a  commis  a  cela.  Ainsi  donc  ceux  qui  ont  charge  d'anoncer  l'Evangile,  deslient