52:404  diceret:  Mutuus  est  inter  meum  apostolatum  et  fidem  electorum  Dei  consensus:  quare  illum  nemo,  nisi  reprobus  et  a  recta  fide  alienus,  reiiciet.  Electos  porro  intelligit,  non  modo  qui  tunc  erant  superstites,  sed  quicunque  fuerant  ab  initio  mundi.  Significat  enim  nullam  se  doctrinam  afferre  quae  non  congruat  cum  fide  Abrahae  et  omnium  patrum.  Ita  si  quis  hodie  Pauli  haberi  vult  successor,  eiusdem  se  doctrinae  ministrum  probet  necesse  est.  Sed  in  his  verbis  tacita  quoque  antithesis  inclusa  est,  ne  quid  evangelio  deroget  multorum  incredulitas  et  contumacia.  Nam  tunc  infirmos  (ut  hodie)  scandalum  hoc  valde  turbabat,  quum  eorum,  qui  se  ecclesiae  titulo  venditabant,  maior  pars  puram  Christi  doctrinam  respueret  Quare  Paulus,  licet  promiscue  Dei  nomen  omnes  iactent,  plurimos  ex  turba  illa  reprobos  esse  docet:  quemadmodum  alibi  (Rom.  9,  7)  tradit,  non  omnes,  qui  genus  ducunt  ab  Abraham  secundum  carnem,  esse  legitimos  Abrahae  filios.  Et  agnitionem.  Copulam  hic  exegeticae  particulae  loco  positam  accipio,  nempe  vel  scilicet.  Exponit  enim  qualis  sit  illa  fides  cuius  meminit.  Quamquam  non  est  plena  eius  definitio:  sed  descriptio  ad  loci  praesentis  circumstantiam  accommodata.  Suum  enim  apostolatum  ut  ab  omni  impostura  et  errore  asserat,  nihil  continere  testatur  nisi  certam  et  compertam  veritatem  quae  homines  ad  purum  Dei  cultum  instituat.  Sed  quia  singulis  verbis  inest  suum  pondus,  sigillatim  excutere  operae  pretium  est.  Primum  quum  fides  agnitio  nominatur,  non  ab  opinione  discernitur  tantum,  sed  ab  informi  illo  papistarum  figmento.  Fidem  enim  implicitam  commenti  sunt  omni  intelligentiae  luce  vacuam.  At  Paulus  dum  istud  fidei  quasi  proprium  assignat,  veritatem  cognoscere,  nullam  certe  absque  notitia  esse  fidem,  palam  ostendit.  Et  in  nomine  v  e  r  i  t  a  t  i  s  melius  exprimitur  certitudo,  quam  exigit  fidei  natura.  Neque  enim  fides  probabili  ratione  contenta  est,  nisi  verum  ipsum  teneat.  Porro  non  de  qualibet  veritate  hic  loquitur,  sed  de  coelesti  doctrina,  quae  humanae  mentis  vanitati  opponitur.  Nam  sicuti  per  illam  se  nobis  Deus  patefecit,  ita  sola  hoc  honore  digna  est:  sicuti  passim  scriptura  tribuere  illi  solet.  Ioh.  16,  13,  Et  spiritus  vos  ducet  in  omnem  veritatem.  Idem  17,  17,  Sermo  tuus