41:404  cheminer  comme  il  apartient,  c'est  a  dire,  en  toute  crainte  et  sollicitude  comme  Dieu  le  commande,  il  ni  ha  celuy  qui  ne  sente  infirmite  en  luy,  voire  combien  que  Dieu  ait  besongne  puissamment  en  luy  encores  que  le  saint  Esprit  nous  gouverne,  si  est  ce  qu'il  y  ha  beaucoup  de  foiblesses,  et  d'infirmites  en  nous  qu'il  faut  peu  de  chose  pour  nous  faire  chanceller.  Quand  quelque  tourbillon  sera  esmeu,  que  nous  verrons  quelque  danger,  qu'il  y  aura  quelque  petite  occasion  pour  nous  divertir  du  bien,  nous  serons  tantost  transportes.  Voiant  ce  vice  la  en  nous,  que  nous  aprenions  de  prier  Dieu,  a  fin  qu'il  luy  plaise  de  nous  subvenir,  de  nous  assister,  et  nous  fortifier  a  ce  que  nous  puissions  resister  aux  assaus,  et  aux  tentations,  qui  nous  pourroient  advenir.  Car  si  nous  devons  estre  songneux  de  prier,  que  Dieu  ne  permette  point  que  nous  pechions  par  infirmite,  que  sera  ce  d'une  pure  rebellion?  Ne  devons  nous  point  craindre,  que  Dieu  nous  lasche  la  bride,  qu'il  nous  abandonne  a  Sathan?  lequel  nous  ameine  a  cette  rage,  et  a  cette  extremite  la,  que  nous  venions  de  propos  delibere  heurter  a  l'encontre  de  Dieu,  car  de  l'un  on  vient  quelquesfois  a  l'autre,  ie  di  qu'il  y  ha  grande  difference  entre  l'infirmite  et  la  malice  de  l'homme.  Mais  depuis  qu'ils  ont  cette  infirmite,  et  qu'ils  se  flattent  en  cela,  il  faut  que  Dieu  les  delaisse,  qu'ils  soient  en  sens  reprouve,  et  qu'ils  se  viennent  ietter  la  comme  a  l'abandon,  quils  facent  la  guerre  a  Dieu,  voire  comme  de  propos  delibere  (comme  i'ay  dit).  Exemple:  si  un  homme  qui  est  en  office,  n'a  tenu  compte  d'empescher  le  mal,  et  maintenir  le  bien,  et  quoy?  il  faudra  caller  la  voile,  et  que  ferions  nous?  sur  cela  il  sera  vaincu,  qu'apres  avoir  passe  un  mal  il  en  passera  et  deux  et  trois,  il  ni  aura  ne  fin  ne  mesure,  Or  Dieu  voit  il  qu'un  homme  se  flatte  en  telle  laschete?  Alors  il  le  laisse:  et  quand  un  homme  sera  delaisse  de  Dieu,  il  faut  que  Sathan  le  possede,  et  qu'il  le  transporte  la  ou  il  veut.  Voila  donc  comme  souventesfois  de  l'infirmite  on  tombe  en  une  certaine  malice,  voire  par  succession  de  temps,  il  y  en  a  beaucoup,  qu'apres  avoir  conneu  la  verite  de  l'Evangile,  toutesfois  n'ont  point  zele  de  suivre  Dieu,  et  faire  protestation  de  leur  foy,  ils  voient  les  abominations  qui  se  commettent  a  l'encontre  de  Dieu,  ils  oient  les  blasphemes,  ils  dissimulent  tout  cela,  et  font  semblant  de  n'en  rien  veoir.  Et  pourquoy?  Il  leur  semble  que  c'est  asses,  qu'ils  connoissent  la  verite  en  leur  coeur.  Et  quand  ils  verront  le  mal,  qu'ils  le  dissimulent  devant  les  hommes.  Or  par  succession  de  temps  Dieu  les  aveugle,  que  cette  clarte  qu'ils  avoient  au  paravant  leur  est  ostee,  et  dont  procede  ce  malheur?  car  au  paravant  on  les  avoit  bien  conneu  de  quelque  bonne  affection,  qu'ils  n'eussent  point  voulu  ainsi  s'eslever  a  l'encontre  de  Dieu.  Ouy  bien,  mais  ils  se  sont