6:403  RESPONSIO  CONTRA  PIGHIUM  DE  LIBERO  ARBITRIO.  qui  ita  ex  uno  vitulo  duos  novit  facere.  Sequitur  enim  uno  contextu  apud  Augustinum  altera  distinctio,  quae  prorsus  ad  eandem  rem  explicandam  facit:  Aliud,  inquit,  est  adiutorium,  sine  quo  aliquid  non  fit;  et  aliud  est  adiutorium,  quo  aliquid  fit.  Primo  itaque  homini,  qui  in  eo  bono,  quo  factus  fuerat  rectus,  acceperat  posse  non  peccare,  posse  non  mori,  posse  bonum  non  deserere,  datum  est  adiutorium  perseverantiae:  non  quo  fieret,  ut  perseveraret,  sed  sine  quo  per  liberum  arbitrium  perseverare  non  posset.  Nunc  vero  sanctis  in  regnum  Dei  per  gratiam  praedestinatis  non  tantum  tale  adiutorium  perseverantiae  datur,  sed  tale,  ut  eis  perseverantia  ipsa  donetur;  non  solum,  ut  sine  isto  dono  perseverantes  esse  non  possint,  verum  etiam,  ut  per  hoc  donum  non  nisi  perseverantes  sint  Non  enim  solum  dixit  (Ioann.  15,  5):  Sine  me  nihil  potestis  facere:  sed  etiam  dixit  (ibid.  v.  16):  Non  vos  me  elegistis:  sed  ego  elegi  vos,  et  posui  vos,  ut  eatis,  et  fructum  afferatis,  et  fructus  vester  maneat.  Quibus  verbis  non  solum  eis  iustitiam,  verum  et  in  illa  perseverantiam  se  dedisse  monstravit.  Quis  nunc,  obsecro,  mihi  non  concedat,  Augustinum  rem  eandem  aliis  verbis  continenter  exponere?  Quid  ergo,  tam  bene  contextas  partes  discerpendo,  proficiet  Pighius?  Verum  tam  est  desper  rata  impudentia,  ut  vel  confuso  oris  strepitu  incre-,  puisse,  semper  pro  victoriae  parte  habeat.  Nam  quum  Augustinus  non  tantum  posse  nobis  dari,  sed  etiam  velle,  testatur:  Deique  gratiam  non  in  hoc  tantum  esse  efficacem  in  nobis,  ut  ipsa  adiuti  fidem  possimus  consequi  si  libeat,  et  consequuti,  in  ea  stare,  sed  omnino,  ut  fideles  simus,  et  in  fide  perseveremus:  ut  invictissima  voluntate  appetamus  quod  bonum  est,  et  invictissima  constantia  ipsum  deserere  [pag.  238]  nolimus:  haec  omnia,  et  similia,  quae  iam  audisti,  non  aliud  Pighio  valent,  nisi  ita  nos  adiuvari,  ut  de  victoria  certi  simus,  si  non  defuerimus