8:400  Cependant  ne  laissons  pas  de  passer  oultre,  scachans  que  Dieu  accepte  nostre  obeissance,  moyennant  que  nous  captivions  et  mattions  tous  nos  sens  et  desirs  pour  les  rendre  subiects  a  luy.  Car  les  Prophetes  et  Apostres  ne  sont  pas  allez  tellement  a  la  mort,  qu'ils  ne  sentissent  en  eulx  quelque  vouloir  de  reculer.  On  te  menera  la  ou  tu  ne  vouldras  point,  disoit  nostre  Seigneur  Iesus  Christ  a  Pierre  (Ieh.  21,  18).  Ainsi  quand  telles  craintes  de  mort  nous  poingnent,  gaignons  par  dessus,  ou  plustost  que  Dieu  gaigne:  et  cependant  tenons-nous  asseurez  que  ce  luy  est  un  sacrifice  aggreable,  que  nous  resistions  et  facions  force  a  nos  affections  pour  estre  du  tout  a  son  commandement.  Et  c'est  la  principale  guerre  en  laquelle  Dieu  veult  que  les  siens  s'employent:  c'est  qu'ils  s'efforcent  a  rabbatre  tout  ce  qui  s'esleve  en  leurs  sens  et  esprits  pour  les  destourner  du  chemin  qu'il  leur  monstre.  Cependant  les  consolations  sont  si  amples,  qu'il  fault  bien  dire  que  nous  soyons  plus  [f.  29]  que  lasches  quand  nous  defaillons.  Anciennement  un  nombre  infini  de  gens,  a  l'appetit  d'une  simple  couronne  de  fueilles,  ne  refusoit  nul  travail,  ne  moleste,  ne  fascherie:  mesme  il  ne  leur  coustoit  rien  de  mourir:  toutesfois  il  n'y  avoit  celuy  d'eulx  qui  ne  combatist  a  l'adventure,  ne  scachant  s'il  debvoifc  gaigner  le  pris  ou  non.  Dieu  nous  propose  la  couronne  immortelle  par  laquelle  nous  soyons  faicts  participans  de  sa  gloire.  Il  n'entend  pas  que  nous  combations  a  l'adventure,  mais  nous  promet  a  tous  le  pris  que  nous  avons  a  desirer.  Quelle  occasion  avons-nous  de  chommer  la-dessus?  Pensons-nous  qu'il  soit  dict  en  vain  que  si  nous  mourons  avec  Iesus  Christ,  nous  vivrons  aussi  avec  luy?  (2  Tim.  2,  11)  Le  triomphe  nous  est  appareille,  et  nous  fuyons  de  combatre  entant  qu'en  nous  est.  C'est  une  doctrine  repugnante  au  iugement  humain,  ie  le  confesse.  Et  aussi  quand  Iesus  prononce  (Matth.  5,  10)  que  ceulx  qui  souffrent  pour  iustice  sont  bien-heureux,  il  ne  met  point  en  avant  une  sentence  qui  soit  aiseement  receue  au  monde.  Au  contraire,  il  veult  que  nous  reputions  a  felicite  ce  que  nostre  sens  iuge  estre  malheur.  Il  nous  semble  que  nous  sommes  miserables  quand  Dieu  nous  laisse  fouler  par  la  tyrannie  et  cruaulte  de  nos  ennemis;  mais  la  faulte  est  que  nous  ne  regardons  point  aux  promesses  de  Dieu,  lesquelles  nous  certifient  que  le  tout  nous  sera  tourne  a  bien.  Nous  sommes  abbatus,  voyans  les  iniques  estre  les  plus  forts  et  nous  tenir  le  pied  sur  la  gorge  :  mais  une  telle  confusion,  comme  dit  sainct  Paul,  nous  doit  plustost  eslever  en  hault.  Car  d'autant  que  nous  sommes  par  trop  addonnez  a  nous  amuser  aux  choses  presentes,  Dieu,  en  permettant  que  les  bons  soyent  mal  traictez,  et  que  les  iniques  ayent  la  vogue,  nous  monstre  par  signes  evidens  qu'un  iour  viendra  auquel