5:400  elementis  vobiscum  affigere.  At,  si  qua  tibi  sinceritatis  cura  esset,  non  ignoras  profecto,  quantum  inter  ista  duo  intersit:  localem  corporis  Christi  praesentiam  a  pane  removeri  et  spiritualem  Christi  potentiam  circumscribi  corporis  cancellis.  Nec  dogma  istud  nostrum  debuisti  novitatis  insimulare,  quum  in  ecclesia  semper  habitum  pro  confesso  fuerit.  Sed  quia  disputatio  haec  sua  magnitudine  librum  unum  impleret,  satius  est,  quo  tanta  molestia  uterque  nostrum  eximatur,  Augustini  Epistolam  ad  Dardanum  legas  :  ubi  reperies,  quomodo  unus  idemque  Christus  et  suae  divinitatis  amplitudine  coelum  terramque  excedat,  et  secundum  humanitatem  non  ubique  sit  diffusus.  Veram  carnis  ac  sanguinis  communicationem,  quae  fidelibus  in  coena  exhibetur,  magnifice  praedicamus.  Eam  carnem  vere  cibum  esse  vitae,  sanguinem  illum  vere  potum,  diserte  ostendimus:  quorum  non  imaginaria  conceptione  contenta  sit  anima,  sed  efficaci  veritate  fruatur.  Praesentiam  Christi,  qua  nos  illi  inseramur,  a  coena  minime  excludimus.  Neque  vero  ipsam  obscuramus,  modo  [fol.  32]  absit  localis  circumscriptio,  modo  ne  gloriosum  Christi  corpus  ad  terrena  elementa  detrahatur,  modo  ne  in  Christum  fingatur  panis  transsubstantiari,  ut  deinde  pro  Christo  adoretur.  Dignitatem  usumque  mysterii  quibus  possumus  elogiis  illustramus:  quanta  deinde  ad  nos  utilitas  redeat,  declaramus.  Quae  omnia  prope  apud  vos  negligantur.  Praeterita  enim,  quae  hic  nobis  confertur,  divina  beneficentia,  praeterito  tanti  beneficii  legitimo  usu,  quibus  plurimum  decebat  immorari,  satis  habetis,  si  populus  ad  signum  visibile,  sine  ulla  spiritualis  mysterii  intelligentia,  obstupescat.  Quod  antem  crassam  illam,  quam  statuitis,  transsubstantiationem  damnavimus  ;  quod  stupidam  illam  adorationem  quae  hominum  mentes  in  elementis  detinet,  in  Christum  assurgere  non  sinit,  perversam  esse  docuimus  et  impiam,  id  non  fecimus,  nisi  suffragante  nobis  veteris  ecclesiae  consensu:  cuius  umbra  frustra  conaris  foedissimas,  quibus  hic  laboratis,  superstitiones  obtegere.  In  auriculari  confessione  illam  Innocentii  legem  improbavimus,  quae  iubet  quotannis  unumquemque  proprio  sacerdoti  recensere  omnia  peccata.  In  ea  porro  abroganda  quas  rationes  sequuti  simus,  recensere  longum  foret.  Rem  tamen  fuisse  nefariam,  vel  inde  apparet,  quod  diro  illo  tormento  solutae  piae  conscientiae,  tunc  acquiescere  demum  in  divinae  gratiae  fiducia  coeperunt,  quum  antea  perpetua  anxietate  aestuassent.  Ut  taceam  interim  tot,  quas  in  ecclesiam  importavit,  clades,  quae  merito  illam  nobis  exsecrabilem  reddere  debeant.  Quod  autem  in  praesentia  agitur,  hoc  habe:  neque  Christi  mandato,  nec  veteris  ecclesiae  instituto  fuisse  traditam.  Locos  scripturae  omnes  valide  extorsimus  sophistis,  quos  ad  eam  detorquere  moliebantur.  Quae  autem