25:400  7.  Moses  autem  natus  erat.  Iterum  singularem  Dei  gratiam  celebrat,  quia  ad  ultimum  usque  senium  viguerint  integri  omnes  sensus  Mosis,  quo  idoneus  esset  ad  munus  suum  obeundum.  Inde  enim  palam  factum  est  quam  cara  esset  Deo  salus  populi,  cui  tam  sollicite  prospexerat.  Reperti  quidem  sunt  qui  ad  centesimum  usque  annum  publice  gubernationi  sufficerent,  sed  paucissimi.  Iam  vero  eo  tempore  usque  adeo  elanguerat  virtus  in  toto  genere  humano,  ut  post  septuaginta  annos  aegre  vitam  traherent  in  molestia  et  labore:  sicuti  Moses  ipse  testatur  (Psal.  90,  10).  Mosen  igitur  insolito  modo  viridem  et  robustum  conservari,  illustre  paterni  amoris  signum  fuit,  quo  populum  suum  prosequutus  est.  Si  longe  ante  terrae  ingressum  collapsae  fuissent  Mosis  vires,  valde  intempestiva  fuisset  populo  eius  debilitas:  et  tamen  naturaliter  tamdiu  par  esse  non  potuit  oneri  ferendo.  Sequitur  ergo  Deum  ubi  passus  non  est  deficere,  mirabiliter  consuluisse  populi  sui  saluti.  De  oculis  quidem  per  synecdochen  sermo  habetur:  summa  tamen  huc  redit,  non  fuisse  imbecillum  vel  caducum,  quia  nec  facultas  ingenii  exhausta  erat,  nec  corpus  exaruerat.  Quod  de  solenni  luctu  additur,  non  longa  expositione  indiget:  quia  alibi  satis  copiose  docui,  ideo  tam  sedulo  intentos  fuisse  veteres  ad  exsequias  mortuis  praestandas,  quia  nondum  quoad  revelationis  modum  adoleverat  eorum  fides,  ut  facile  esset  carere  externis  adminiculis,  quorum  hodie  sub  evangelio  similis  non  est  usus.  Lugere  mortuos  humanum  est:  deinde  merito  susceptus  fuit  luctus  ob  publicam  ecclesiae  iacturam:  sed  hic  refertur  caeremonia  quae  finem  cum  legalibus  umbris  accepit.  Ideoque  ita  sepeliendi  hodie  sunt  mortui,  ut  luctum  temperet  spes  resurrectionis  tam  clare  patefacta  Christi  adventu.  9.  Iosua  autem.  Iterum  ostenditur  quam  perseveranter  institerit  Deus  in  curanda  populi  salute.  Iam  ante  vidimus,  Mosis  rogatu  electum  fuisse  Iosue,  qui  in  eius  locum  succederet.  Nunc  ubi  provinciam  obire  coepit,  additus  fuit  spiritus  sapientiae,  ut  re  ipsa  palam  fieret  divinitus  creatum  esse.  Praeditus  quidem  ante  id  tempus  fuerat  eximiis  donis,  sed  longe  nunc  splendidius  ornatus  fuit  dignitatis  insignibus,  ut  Dei  vocatio  certius  comprobaretur:  sic  enim  Deus  quos  vocat  agendi  virtute  instruere  solet.  Intercessit  etiam  manuum  impositio,  quae  fuit  non  inane  gratiae  Dei  symbolum.  Verum  quia  de  his  alibi  satis  copiose:  nunc  tantum  leviter  attingo.  10.  Non  surrexit  propheta.  Elogium  hoc  videtur  additum  fuisse,  ut  a  Mose  penderent  filii  Abrahae  usque  ad  Christi  manifestationem:  quia  etsi  subinde  excitati  sunt  prophetae,  primatum  tamen  residere  penes  Mosen  oportuit,  ne  a  legis  regula  vel  minimum  deflecterent.  Tenendum  igitur