51:40  fois  reputez  vertueux,  et  aussi  on  trouvera  quelque  honnestete  en  leur  vie  :  tous  ne  seront  pas  paillards  pour  le  moins  ou  yvrongnes  ou  larrons.  Comment  donc  sainct  Paul  dit  il,  que  ceux-la  sont  charnels?  Or  c'est  d'autant  que  le  coeur  de  l'homme  (ainsi  qu'il  est  dit  en  Ieremie)  est  un  abysme  si  profond  d'iniquite,  qu'on  n'y  trouve  ni  fonds  ni  rive:  car  le  Prophete  s'escrie  en  disant,  Quel  abysme  est-ce  que  le  coeur  de  l'homme,  et  qui  le  sondera?  Il  n'y  a  que  Dieu,  dit-il.  Car  nous  voyons  comme  les  hommes  se  flattent,  et  qu'ils  sont  empunaisis  en  leurs  vilenies,  et  s'endurcissent  tellement  en  leurs  pechez  qu'ils  entassent  mal  sur  mal  et  peche  sur  peche,  et  se  font  accroire  que  leurs  vices  sont  vertus:  mais  leur  vie  aura  quelque  apparance  et  beau  lustre.  Or  ce  n'est  pas  pourtant  que  ceux  qui  n'ont  point  este  enseignez  soyent  iustifiez.  Comme  quand  sainct  Paul  au  premier  chapitre  des  Romains  dit,  que  tout  le  monde  est  condamne  d'impiete  et  (l'ingratitude,  d'autant  que  Dieu  s'est  declare  a  tous,  et  sans  exception,  tellement  que  c'est  assez  pour  leur  oster  toute  excuse,  il  adiouste,  D'autant  qu'ils  n'ont  point  honorez  Dieu  comme  ils  devoyent  apres  l'avoir  cognu,  qu'il  les  a  mis  en  sens  reprouve,  qu'il  les  a  abandonnez  a  des  appetis  vilains  et  enormes:  et  puis  il  recite  des  choses  detestables.  Entre  autres  il  met  les  meurtres,  les  paillardises  et  autres  vilenies  et  infections,  desquelles  on  ne  doit  point  faire  mention.  Apres  il  met  les  envies,  comme  en  ce  passage,  les  meschantes  trafiques,  les  fraudes,  les  periures,  les  piques,  les  contentions  et  debats.  Et  bien,  tout  cela  n'a  pas  este  cognu  en  tous  incredules:  et  toutesfois  sainct  Paul  dit,  que  tous  depuis  le  plus  grand  iusques  au  plus  petit  sont  ingrats  a  Dieu,  et  qu'ils  l'ont  fraude  de  l'honneur  qui  luy  appartenoit:  et  par  ce  moyen  sont  sacrileges,  car  ils  luy  ont  ravi  tout  ce  qui  luy  estoit  propre:  et  pourtant  qu'il  leur  a  rendu  le  salaire  qu'ils  meritoyent,  voire  pour  ce  que  la  semence  de  tous  pechez  se  trouvera  en  la  nature  de  l'homme.  Tous  donc  sont  farcis  d'autant  de  vices  qu'on  pourra  penser:  mais  Dieu  encores  tient  la  bride,  qu'il  ne  permet  pas  que  les  hommes  s'addonnent  a  toute  vilenie.  Et  qu'ainsi  soit,  il  y  a  beaucoup  d'incredules  qui  ne  sont  point  gouvernez  selon  leur  sens  naturel,  qui  toutesfois  seront  chastes  et  pudiques,  ils  ne  raviront  point  le  bien  d'autruy,  ils  seront  sobres  et  honnestes:  brief,  ils  auront  beaucoup  de  vertus  selon  l'opinion  du  monde.  Et  pourquoy  donc  sont-ils  condamnez  comme  paillards,  ravisseurs  et  yvrongnes?  C'est  d'autant  qu'ils  n'ont  point  ces  vertus-la  pour  obeir  a  Dieu,  et  n'y  a  nulle  integrite  en  leur  coeur:  mais  c'est  la  honte  qui  les  retient,  ou  bien  ils  sont  retenus  d'une  autre  facon  qui  nous  est  incognue.  Tant  y  a  que  Dieu  par  ce  moyen  espargne  le  genre  humain,  a  fin  que