48:40  sum.  Longe  aliter  scriptura,  quae  speciale  Deo  regimen  in  rebus  singulis,  et  in  hominum  actionibus  vendicat.  Nostrum  tamen  est  expendere,  in  quem  finem  hoc  doceat.  Cavendae  enim  sunt  delirae  speculationes,  quibus  multos  abripi  videmus.  Scriptura  vult  fidem  nostram  exercere,  ut  sciamus  nos  protegi  Dei  manu,  ne  simus  Satanae  et  impiorum  iniuriis  obnoxii.  Hoc  unum  amplecti  utile  est.  Neque  enim  aliud  sibi  voluit  Petrus  hoc  loco.  Imo  in  Christo  sobrie  sapiendi  exemplum  nobis  proponitur.  Non  enim  dubium  est,  quin  obnoxia  fuerit  corruptioni  eius  caro,  secundum  naturam.  Atqui  immunem  fecerat  Dei  providentia.  Si  quis  roget,  annon  fragilia  fuerint  ossa  Christi:  non  erit  negandum,  fuisse  quidem  naturaliter:  sed  tamen  nullum  os  potuisse  minui,  quoniam  sic  Deus  statuerat.  Hoc,  inquam,  exemplo  admonemur,  sic  dandum  esse  principatum  Dei  providentiae,  ut  intra  limites  nostros  stemus:  neque  nos  temere  ingeramus  in  Dei  arcana,  quo  minime  penetrat  oculi  nostri  acies.  Per  manus  impiorum.  Quia  videtur  innuere  Petrus,  impios  paruisse  Deo,  hinc  sequitur  ex  duobus  absurdis  alterutrum  :  vel  Deum  esse  malorum  autorem:  vel  homines  quodvis  scelus  perpetrando,  non  peccare.  Respondeo  de  secundo,  impios,  utcunque  exaequantur  quod  apud  se  Deus  statuit,  nihil  tamen  minus  quam  Deo  obedire.  Nam  obedientiae  ex  voluntario  affectu  nascitur.  Scimus  autem  impiis  longe  aliud  esse  propositum.  Deinde,  nemo  obedit  Deo,  nisi  cui  comperta  est  eius  voluntas.  Obedientia  igitur  ex  notitia  pendet  divinae  voluntatis.  Porro,  Deus  in  lege  suam  nobis  voluntatem  patefecit.  Quare,  illi  demum  obediunt  Deo,  qui  opera  sua  exigunt  ad  legis  regulam  :  deinde  eius  imperio  se  voluntarii  subiiciunt.  Nihil  tale  in  omnibus  impiis  cernimus,  quos  Deus  huc  vel  illuc  nescientes  impellit.  Nemo  igitur  excusabiles  hoc  praetextu  esse  dicet,  quia  pareant  Deo:  quum  et  Dei  voluntas  in  lege  nobis  quaerenda  sit:  et  illi,  quantum  in  se  est,  repugnare  Deo  cupiant.  Quantum  ad  alterum  pertinet,  nego  Deum  mali  esse  autorem:  quia  in  hac  voce  certa  est  notatio  pravi  affectus.  Maleficium  enim  aestimatur  ex  fine,  quo  quisque  tendit.  Homines  quum  vel  furtum,  vel  homicidium  perpetrant,  ideo  peccant,  quia  fures  sunt  aut  homicidae.  In  furto  autem  et  homicidio  sceleratum  consilium.  Deus  qui  illorum  malitia  utitur,  in  superiore  gradu  locandus  est.  Longe  enim  aliud  spectat:  quia  alterum  vult  castigare,  alterius  exercere  patientiam:  atque  ita  nunquam  a  sua  natura,  hoc  est,  a  perfecta  rectitudine  deflectit.  Ita,  quod  traditus  fuit  Christus  per  manus  impiorum,  quod  crucifixus,  factum  est  Dei  nutu  et  ordinatione.  Proditio  autem,  quae  per  se  nefaria  est,  et  caedes  quae  tantum  scelus  in  se  continet,  Dei  opus  non  debet  censeri.