47:40  opportune  agat.  Qui  ad  fatalem  temporum  ordinationem  hunc  locum  traxerunt  magis  sunt  ridiculi  quam  ut  verbo  uno  sit  opus  ad  eos  refellendos.  Hora  Christi  aliquando  dicitur,  quae  illi  destinata  est  a  patre.  Et  tempus  suum  postea  vocabit,  quod  illi  commodum  erat  et  aptum  ad  exsequenda  patris  mandata:  hoc  autem  loco  temporis  ad  agendum  sumendi  et  eligendi  arbitrium  sibi  vindicat.  5.  Dicit  mater  eius  ministris.  Hic  sancta  virgo  specimen  edit  verae  obedientiae,  quam  filio  debebat,  ubi  non  de  humanis  officiis,  sed  divina  eius  potentia  agebatur.  Modeste  igitur  acquiescit  in  Christi  responso,  aliosque  similiter  hortatur  ut  eius  imperio  pareant.  Fateor  quidem  ex  circumstantia  praesenti  virginem  sic  loquutam  esse,  ac  si  negaret  hac  in  parte  quidquam  sibi  esse  iuris,  Christum  suo  unius  arbitrio  facturum  quod  placuerit.  Sed  si  eius  consilium  spectes,  latius  patet  haec  sententia.  Potestate  enim,  quam  sibi  perperam  sumpsisse  videri  poterat,  se  abdicat  primum  et  exuit:  deinde  totam  uni  Christo  asserit,  quum  sequendum  praecipit  eius  imperium.  Ergo  generaliter  hinc  docemur,  si  quid  expetimus  a  Christo,  non  aliter  nos  votorum  fore  compotes,  nisi  ab  ipso  toti  pendemus,  in  eum  respicimus,  facimus  denique  quidquid  iubet.  Atqui  nos  ad  matrem  non  ablegat,  sed  ad  se  invitat  potius.  6.  Erant  autem  illic  hydriae.  Ex  supputatione  Budaei  has  hydrias  admodum  capaces  fuisse  colligimus.  Nam  quum  metreta  faciat  viginti  congios,  singulae  ut  minimum  huius  regionis  sextarium  continebant.  Largam  ergo  vini  copiam  suppeditavit  Christus:  nempe  quae  plus  centum  et  quinquaginta  hominibus  sufficeret  ad  hilare  convivium.  Adde  quod  tam  numerus  hydriarum,  quam  modus  ipse  ad  comprobandam  miraculi  veritatem  facit.  Si  duo  tantum  aut  tres  congii  fuissent,  suspicari  multi  poterant  aliunde  fuisse  advectos.  Si  in  vase  tantum  uno  facta  fuisset  conversio  aquae  in  vinum,  non  ita  perspicua  testataque  fuisset  miraculi  certitudo.  Non  frustra  igitur  evangelista  numerum  commemorat,  nec  frustra  exprimit  quantum  caperent.  Porro  hoc  ex  superstitione  natum  erat,  ut  tot  ac  tam  ampla  vasa  illic  prostarent.  Abluendi  quidem  ritum  habebant  ex  lege  Dei,  sed  ut  mundus  semper  nimius  est  in  rebus  externis,  Iudaei  praescripta  a  Deo  simplicitate  non  contenti  continuis  adspersionibus  ludebant:  atque  ut  ambitiosa  est  superstitio,  non  dubium  est  quin  hoc  etiam  pompae  serviret,  quemadmodum  hodie  in  papatu  videmus,  quaecunque  ad  Dei  cultum  pertinere  dicuntur,  ad  meram  ostentationem  esse  composita.  Duplex  ergo  vitium  erat:  quod  absque  Dei  mandato  in  fictitio  et  supervacua  caeremonia  temere  se  occupabant:  deinde,  quod  religionis  praetextu  ambitio  in  illo  apparatu  regnabat.  Mira  porro  in  papatu  quorundam  nebulonum  fuit  improbitas,  qui  hydrias  obtrudere  ausi  sunt,  primum