40:40  erat  spiritus  ad  ambulandum  ambulabant.  Spiritus  hic  accipitur  pro  animo  vel  consilio.  Scimus  saepe  accipi  pro  vento  metaphorice,  scimus  etiam  accipi  pro  anima  hominis:  sed  hic  intelligi  debet  voluntas:  et  tamen  alludit  propheta  ad  ipsum  motum,  quo  rapiuntur  angeli,  ubi  Deus  illorum  opera  utitur.  Quoniam  ergo  tantus  est  vigor  atque  etiam  celeritas  in  angelis,  ut  similes  sint  vento,  propheta  videtur  ad  hanc  similitudinem  alludere.  Et  quod  in  Psalmo  (104,  4)  dicitur,  Deum  facere  ventos  suos  ministros,  Apostolus  1  ad  Hebraeos  capite  concinne  ad  ipsos  angelos  accommodat.  Optime  igitur  stabit  haec  analogia,  nempe  quod  angeli  ambularent  quocunque  ferebat  voluntas:  et  tamen  sub  hac  voce  designet  propheta  motum  illum  arcanum,  quo  Deus  flectit  angelos  suos,  prout  visum  est.  Interea  confirmat  quod  nuper  vidimus,  angelos  non  temere  rapi  huc  et  illuc,  sed  habere  destinatum  finem,  quia  scilicet  per  ipsos  operatur  Deus  qui  est  fons  omnis  sapientiae.  Dicit  rursus  sic  ambulasse,  ut  non  redirent,  hoc  est  ut  non  reflecterent  cursum  suum.  Postea  tamen  dicet  reversa  fuisse.  Sed  haec  conciliare  facile  est,  quia  tantum  significat  non  abruptum  fuisse  cursum.  Quum  ergo  pergerent  in  unam  partem,  donec  spatium  suum  conficerent,  ambulabant,  et  tamen  postea  revertebantur  instar  fulguris.  Neque  enim  Deus  sic  angelos  suos  semel  ad  opus  accommodat,  ut  postea  quiescant:  sed  quotidie,  imo  singulis  momentis  ipsos  ad  obsequium  suum  exercet.  Quum  ergo  angeli  sint  assidui  in  opere,  non  mirum  est  si  propheta  dicat  ipsos  ire  et  reverti:  et  tamen  quum  dicit  non  reverti,  hoc  optime  convenit,  quia  scilicet  non  retrocedunt  donec  officio  suo  satisfecerint.  Denique  haec  visio  non  alio  spectavit,  nisi  ut  sciret  propheta  Deum  non  deserere  in  medio  cursu  opera  sua,  sicuti  in  Psalmo  (138,  8)  dicitur.  Quoniam  ergo  in  Dei  operibus  nullum  est  inchoatum  et  mutilum,  angeli  pergunt,  et  conficiunt  spatium  suum  usque  ad  metam  :  postea  revertuntur  instar  fulguris,  ut  paulo  post  dicet.  Sequitur,  13.  Et  similitudo  animalium  adspectus  eorum  tanquam  carbones  ignis  ardentis,  tanquam  adspectus  lampadum  discurrens  inter  animalia  :  et  splendor  igni>  et  ex  igne  egrediebatur  fulgur.  Oportuit,  quemadmodum  heri  attigi,  aliquid  divinum  splendere  in  visione,  quod  Deus  proposuit  faciem  hominis,  et  bovis,  et  aquilae,  et  leonis,  in  eo  in  se  accommodavit  ad  populi  socordiam,  ut  dictum  fuit:  imo  ad  captum  ipsius  prophetae:  quia  ut  sumus  homines,  non  possumus  penetrare  supra  coelos.  Deus  ergo  prophetae  sui  et  omnium  piorum  rationem  habuit:  sed  voluit  simul  oblique  exprobrare  stuporem  populo.  Interea  si  facies  hominis