34:40  vigueur  des  hommes?  Il  n'y  a  qu'un  souffle.  Et  puis,  que  nostre  vie  soit  tant  longue  qu'on  voudra:  encores  n'est-ce  qu'un  petit  passage.  Ce  sont  donc  des  annees  de  petit  nombre,  quant  au  cours  de  la  vie  humaine:  toute  la  vigueur  que  nous  y  avons,  n'est  qu'une  chose  tant  fade  que  cela  s'escoule.  Puis  qu'ainsi  est,  apprenons  de  ne  nous  point  ici  endormir,  cognoissans  que  Dieu  nous  monstre  combien  nous  sommes  fragiles  au  monde,  qu'il  nous  donne  occasion  de  penser  a  lui,  et  de  cercher  la  vie  celeste,  et  de  ne  nous  point  tormenter  outre  mesure,  quand  nous  voyons  que  nostre  vie  s'en  va  en  decadence,  que  petit  a  petit  elle  defaut.  Que  donc  nous  ne  soyons  point  faschez  de  cela.  Et  pourquoy?  Dieu  si  tost  qu'il  nous  met  au  monde,  nous  declare  qu'il  n'y  a  que  pour  y  passer  viste,  et  comme  pour  y  faire  un  tour.  Faut-il  donc  que  nous  soyons  ici  appuyez,  comme  s'il  sembloit  que  nostre  vie  fust  si  robuste,  et  qu'il  n'y  eust  que  redire?  C'est  ce  que  nous  avons  encores  a  retenir  en  ce  passage.  Il  y  a  a  noter  aussi  sous  le  mot  de  Sepulchres,  que  nous  sommes  non  seulement  assiegez  d'une  espece  de  mort,  mais  de  plusieurs.  Nous  avons  une  vie  seule,  ouy  qui  est  bien  caduque,  elle  consiste  en  un  souffle  qui  n'est  rien.  Or  maintenant  si  nous  regardons  de  pres  a  nous,  il  y  a  une  centaine  de  morts  qui  nous  environnent.  Et  voila  pourquoy  Iob  a  use  du  nombre  pluriel  en  parlant  de  Sepulchres.  C'estoit  bien  assez  de  dire,  Le  sepulchre  m'est  appreste,  ou,  ie  ne  le  puis  fuir:  mais  il  dit,  Sepulchres  pour  moy.  Et  faut-il  plus  d'une  fosse  a  un  homme?  Nenni.  Mais  Iob  signifie  que  quand  il  auroit  peu  sortir  d'une  mort,  il  y  en  a  une  seconde  qui  l'attend,  une  troisieme,  bref,  qu'il  faut  qu'il  perisse,  encores  qu'il  ait  surmonte  beaucoup  de  dangers.  Vray  est  que  nous  ne  venons  pas  tous  en  telles  extremitez  que  Iob:  mais  si  est-ce  qu'il  n'y  a  celui  qui  ne  se  trouve  en  tel  estat,  c'est  assavoir,  que  nous  n'avons  qu'une  vie  entre  beaucoup  de  morts  qui  nous  sont  apprestees  Que  faut-il  donc?  Que  nous  apprenions  d'invoquer  Dieu,  et  lui  remettre  nostre  esprit  entre  ses  mains,  afin  que  nous  soyons  asseurez.  Quand  donc  il  plaira  a  Dieu  d'estre  gardien  de  nostre  vie,  marchons  nostre  train,  sans  estre  en  trop  grand  souci.  Et  au  reste,  quand  il  y  aura  mille  morts  pour  nous  abysmer,  Dieu  est  assez  puissant  pour  nous  en  retirer,  comme  il  est  dit  au  Pseaume  (68,  21),  Que  c'est  a  lui,  a  qui  appartiennent  les  issues  de  mort,  c'est  a,  dire,  qu'il  a  les  moyens  de  nous  en  affranchir,  voire  combien  qu'ils  nous  soyent  incomprehensibles.  Cependant  neantmoins  que  nous  soyons  advertis  de  tousiours  nous  apprester  pour  sortir  du  monde,  que  nous  ne  soyons  point  trop  adonnez  a  estre  ici  bas:  car  qu'y  gaignerons-nous?  Ainsi  donc  que  nous  ayons  tousiours  un  pie  leve,