33:40  cores  nous  avons  a  noter,  que  Iob  a  bien  regarde,  et  cognu  ce  que  l'experience  nous  monstre,  qu'en  tous  banquets  il  y  a  tousiours  quelque  desordre,  la  ou  Dieu  ne  sera  point  honore  comme  il  doit.  Premierement,  si  on  s'assemble,  il  y  aura  de  la  superfluite  quelques  fois  aux  viandes,  et  ceux  qui  seront  assemblez  par  compagnie  mangeront  et  boiront  outre  leur  portion  ordinaire.  Et  bien,  on  ne  pense  point  a  tous  ces  exces-la,  et  les  plus  saincts  gens  craignans  Dieu  y  sont  surprins.  Vray  est  qu'ils  ne  seront  point  gourmans  pour  se  farcir  le  ventre,  et  pour  se  saouler  comme  des  pourceaux,  tant  moins  encores  seront-ils  yvrongnes  pour  avoir  leur  esprit  abruti:  non,  mais  tant  y  a  qu'ils  peuvent  bien  exceder  mesure.  Et  pourquoy?  Nous  voyons  que  sans  y  penser  on  s'escoule  en  cela.  Ainsi  donc  voila  desia  un  mal  qui  se  fait  en  ces  banquets,  encores  qu'ils  soyent  instituez  pour  bonne  cause,  et  que  l'intention  de  celui  qui  convie  ses  amis,  et  de  ceux  qui  y  viennent  pour  lui  tenir  compagnie,  soit  bonne:  car  a  grand  peine  se  passera-on  qu'il  n'y  ait  quelque  faute,  de  laquelle  mesmes  on  ne  s'appercoit  point.  Et  puis  quand  on  est  la,  combien  y  a-il  de  propos  frivoles  qui  se  tienent?  La  ou  on  devroit  manger  comme  en  la  presence  de  Dieu,  et  se  resiouri  comme  avec  ses  Anges,  il  y  aura  des  vanitez  beaucoup,  qui  transporteront  les  hommes  tellement,  qu'il  semble  a  beaucoup,  qu'ils  ne  font  point  bonne  chere,  sinon  qu'ils  s'esgayent  ie  ne  say  comment:  ie  di  mesmes  des  bons.  Il  y  a  encores  d'autres  mauvaises  queues:  et  selon  qu'on  y  pensera  de  pres,  nous  verrons  que  Dieu  y  est  offense,  en  plusieurs  sortes.  Ainsi  donc  notons  bien,  que  Iob  n'a  point  este  sans  cause  en  perplexite,  et  en  doute  si  ses  enfans  avoient  peche  contre  Dieu,  veu  qu'ils  faisoient  ainsi  des  banquets,  encores  (comme  i'ay  dit)  qu'ils  fussent  des  gens  fideles.  Or  si  ainsi  est,  que  la  ou  les  banquets  sont  reglez  le  mieux  qu'il  est  possible,  encores  y  a-il  de  la  faute  que  Dieu  condamne:  que  sera-ce  de  ceux  qui  chassent  Dieu  de  leur  compagnie,  et  de  leur  table,  comme  ordinairement  on  en  usera?  Car  s'il  est  question  de  faire  banquets,  par  ou  commence-on?  Est-ce  par  invoquer  le  nom  de  Dieu?  O  il  sembleroit  que  ce  fust  matiere  de  melancolie:  il  faut  donc  que  le  nom  de  Dieu  soit  enseveli.  Est-on  bien  saoul?  de  rendre  graces,  il  n'en  est  point  de  nouvelle.  Car  il  faut  qu'il  leur  souviene  de  la  bonne  chere  qu'ils  ont  faite,  c'est  a  dire  qu'ils  soyent  pourceaux.  Car  si  on  pense  a  Dieu,  il  semble  que  toute  leur  ioye  qu'ils  ont  prinse  en  banquetant,  soit  changee  en  dueil,  et  puis  tout  y  sera  desborde,  tellement  que  il  ne  sera  question  que  de  tenir  propos  vilains  et  dissolus,  ou  bien  propos  de  trahisons  et  malices,  qu'il  ne  sera  nouvelle,  sinon  de  deschirer  son  prochain,  qu'on  ma-