30:40  Nihilominus  tamen  ille  in  unum  Deum  respicit,  cuius  virtutem  et  potentiam  nullis  posse  terminis  contineri  docet:  ac  proinde  non  effertur  regia  sua  dignitate,-  neque  suis  militibus  confidit,  quorum  sine  Deo  nullas  vires  fore  agnoscit.  Denique  longe  aliter  se  gessit  quam  solent  reges  aut  imperatores,  qui  victoriam  ex  suorum  militum  numero,  vel  alacritate  et  fortitudine  metiuntur:  ac  proinde  quum  tot  equorum  millia,  tot  munitiones,  tot  armatos  milites  recensent,  sibi  nihil  metuendum  arbitrantur.  Nae  mortales  istiusmodi  auxiliis  ad  victoriam  consequendam  indigent:  sed  longe  aliter  Deus,  qui  a  nullo  mortalium  quidquam  mutuatur:  sed  cuius  manus  satis  est  potens  ad  suos  in  quovis  discrimine  adiuvandos.  Quamobrem  altius  animis  nostris  hanc  doctrinam  infigamus,  Deo  nihil  obstare  posse  quominus  suis  opportunum  semper  auxilium  adferat.  Nam  quum  hominum  operam  adhibet  in  suis  sublevandis,  magno  illos  honore  afficit:  sed  tamen  non  facit  aliqua  coactus  necessitate.  Ecquis  enim  dubitat,  imo  quis  non  habet  pro  certo  Deum,  ut  res  omnes  creavit,  ita  etiam  illis  uti  posse  pro  suo  arbitrio  ad  nos  tuendos  et  conservandos,  quum  in  ipsius  obedientia  constanter  ambulaverimus,  et  quocunque  vocaverit  intrepide  perrexerimus?  Nae  si  animis  nostris  isthaec  haeserint,  nullum  periculum,  nullus  mortis  metus  nos  ab  officio  poterit  avocare,  ac  ne  vel  tantillum  quidem  commovere*  Et  de  Ionathani  conatu  hactenus,  de  quo  deinceps  adhuc  pluribus  acturi  sumus.  Deinceps  vero  Saul  dicitur  audivisse  tumultum  in  castris,  et  summum  sacerdotem  advocasse,  iu8sisseque  ut  arcam  Domini  admoveret,  atque  ephod  indueret,  Dominumque  sciscitaretur.  Interim  vero  etiam  quum  Ionathanum  abesse  animadverteret,  iussisse  eundem  requiri  :  et  simul  etiam  sacerdotem  manum  suam  recipere,  et  ulterius  non  progredi.  Diximus  vero  initio  huius  historiae  observandum,  Deum  ita  misertum  esse  populi  sui,  ut  Sauli  tamen  summum  dedecus  et  ignominiam  inusserit,  atque  omni  laude  indignum  esse  declararit.  Nam  videtur  Saul  metu  se  in  castris  continuisse,  et  progredi  non  ausus  fuisse,  dum  Ionathanus  etiam  audet  adversus  tantum  exercitum  progredi,  et  tot  armatos  et  instructos  milites  solus  adoriri.  Saulis  tamen,  fateor,  ex  eo  facto  fama  vehementer  aucta  est  :  verumtamen  spiritus  sanctus  nos  docet  nihil  hic  Saulem  potuisse,  neque  eius  viribus  aut  prudentia  quidquam  gestum  esse:  sed  quum  Ionathani  consilia  et  eorundem  exitum  perspexisset,  persequendos  hostes  esse  illum  iudicasse,  populumque  ad  insequendos  hostes  hortatum  esse,  ut  si  fieri  posset,  ne  unus  quidem  ex  tanta  multitudine  superesset.  Qua  in  re  fecit  manifestam  suam  arrogantiam  et  temeritatem  cum  summa  crudelitate  coniunctam,  quemadmodum  inferius  vi-