1:40  [CO  1.  40]  virginitas.  Vitam  angelicam  vocant,  in  hoc  angelis  Dei  maxime  iniurii,  quibus  scortatores,  adulteros  et  aliquid  multo  peius  ac  foedius  comparant.  Et  sane  argumentis  hic  minime  opus  est,  ubi  reipsa  palam  revincuntur.  Videmus [p. 68]  enim,  quam  horrendis  poenis  huiusmodi  arrogantiam,  et  donorum  suorum  con-  [OS  51]  temptum  passim  ulciscatur  Dominus.  Coniuges  vero  neque  sibi  licere  omnia  ipsi  existiment,  sed  suam  quisque  uxorem  sobrie  ac  modeste  habeat,  et  vicissim  uxor  virum;  sic  agentes,  ne  quid  omnino  indignum  honestate  ac  temperantia  matrimonii  admittant,  postremo  cogitent  se  in  Domino  nupsisse.  MANDATUM  VIII.  Non  furtum  facies.  Hanc  sententiam  habet.  Quandoquidem  timeri  a  nobis  Deum  atque  amari  oportet,  ne  cuiquam  vel  fraude  intercipiamus,  vel  manu  ac  vi  rapiamus  quod  suum  est;  ne  quem  in  negotiis  ac  contractibus  imperitum  circumscribamus,  aut  plus  vendendo,  aut  iusto  vilius  emendo  ab  iis,  qui  rerum  pretia  ignorant,  vel  quavis  alia  arte  ac  dolo  quo  bonis  alienis  manum  iniiciamus.  Verum,  si  quis  est  in  nobis  timor  atque  amor  Dei,  huc  magis  omni  conatu  incumbamus,  ut  amicos  iuxta  ac  inimicos,  quoad  licet,  consilio  atque  ope  in  retinendis  suis  iuvemus,  ac  nostro  potius  cedamus  quam  ex  alieno  subducamus;  neque  id  solum,  sed  si  rerum  difficultate  premuntur,  eorum  necessitatibus  communicemus,  ac  inopiam  nostra  copia  sublevemus  (Ies.  58.  Rom.  12.  2  Cor.  8.  Eph.  4  etc.). [p. 69]  MANDATUM  IX.  Non  falsum  testimonium  dices.  Hoc  vult.  Quandoquidem  timeri  Deum  a  nobis  atque  amari  oportet,  ne  quem  falsa  accusatione  premamus,  ne  cuius  famam  proscindamus,  ne  maledictis  et  amaris  salibus  vel  linguam,  vel  aures  praebeamus,  ne  quid  de  aliquo  sinistrum  suspicemur  aut  sentiamus;  verum,  si  quis  est  timor  atque  amor  Dei  in  nobis,  de  omnibus,  quoad  licet,  et  candide  sentiamus  et  honorifice  loquamur,  ut  aequi  erga  omnes  interpretes,  eorum  dicta  et  facta  in  optimam,  quantum  licebit,  partem  accipiamus  (Matth.  7.  Rom.  13  et  14).  Huc  quoque  extenditur  mandatum  istud,  ne  ullis  mendaciis  delectemur,  ne  scurrilem  urbanitatem  affectemus,  ne  urbanae  atque  otiosae  loquacitati  nos  accommodemus  (Psal.  5.  Matth.  12.  Eph.  4  et  5).  [OS  52]