39:4  4  eius  vecordia  et  stupor,  quia  in  Deum  non  respexit.  Cras  reliqua  prosequar.  Coepimus  heri  tractare  de  superbia  atque  etiam  furore  regis  Zedechiae,  quod  teneret  prophetam  in  custodia,  quum  tamen  obsideretur  ab  hostibus,  sicuti  praedictum  fuerat.  Videbat  Ieremiam  loquutum  esse  quasi  ex  ore  Dei.  Nam  effectus  vaticinii  satis  probabat  non  temere  quidquam  protulisse,  sed  quod  divinitus  fuerat  mandatum  :  non  tamen  desinit  a  sua  pertinacia.  Iam  verba  etiam  satis  ostendunt  fuisse  prorsus  excaecatum  quum  diceret,  Quare  prophetas  nobis.  Venient  Chaldaei,  et  capient  urbem?  Non  erat  quidem  propositum  huic  stulto  regi  ac  vesano  os  prophetae  obstruere,  et  simul  fateri  ipsum  habere  mandatum  a  Deo:  sed  ita  solent  reprobi.  Prosiliunt  enim  caeco  impetu  adversus  Dei  servos,  nec  quidquam  discernunt.  Si  quis  ipsos  interroget,  an  velint  aperte  et  ex  professo  obstare  ne  Deus  sit  ipsorum  iudex,  negabunt:  sed  interea  non  sustinent  se  moneri  et  coargui.  Hic  ergo  quasi  in  speculo  perspicimus  quam  furiose  omnes  reprobi  Deo  resistant,  et  conentur  spiritum  eius,  quantum  in  se  est,  exstinguere.  Denique  possent  quidem  concedere  aliquod  imperium  Deo,  modo  cum  eo  transigerent  ne  quid  adversus  ipsorum  cupiditates  loqueretur  per  suos  prophetas.  Porro  minime  dubium  est  quin  praecipue  exasperatus  fuerit  his  prophetae  verbis,  4.  JEt  Zedechias  rex  Iehudah  non  effugiet  e  manu  Chaldaeorum,  quia  tradendo  tradam  in  manum  regis  Babel,  et  loquetur  os  eius  cum  ore  illius,  et  oculi  eius  oculos  eius  videbunt.  Quum  ergo  videret  rex  se  non  eximi  a  communi  iudicio,  hac  de  causa  praecipue  succensuit  Ieremiae.  Volunt  enim  reges  solvi  legibus,  atque  ut  permittant  obiurgari  populum,  tamen  volunt  esse  sacrosancti.  Quum  ergo  Ieremias  regem  Zedechiam  una  cum  vulgo  ipso  ignobili  involveret,  hoc  non  fuit  tolerabile  regi  superbo.  Hinc  tanta  indignatio,  ut  includeret  Ieremiam  in  carcere:  deinde  esset  implacabilis,  quum  tamen  urgeret  eum  manus  Dei.  Postea  sequitur,  5.  Et  Babylonem  abducet  Zedechiam,  et  illic  erit  usque  dum  visitavero  ipsum,  dicit  Iehovah:  quando  praeliati  fueritis  adversus  Chaldaeos,  non  prospere  vobis  cedet  Prosequitur  eandem  sententiam  :  Abducet,  inquit,  rex  Nabuchadneser  Zedechiam  captivum,  et  manebit  in  exsilio  usque  dum  visitavero  ipsum.  Quidam  hoc  tempus  visitationis  intelligunt  de  morte.