8:399  399  QUATRE  SERMONS.  400  afflictions  nous  soyent  converties  en  honneur  et  en  un  privilege  special,  d'autant  que  par  icelles  nous  sommes  associez  en  la  compaignie  de  son  Fils.  Ne  fault-il  pas  bien  dire,  quand  nous  desdaignons  une  condition  si  heureuse,  que  nous  avons  bien  mal  proufite  en  la  doctrine  Chrestienne?  Voyla  pourquoy  sainct  Pierre  (1  Pierre  4,  15),  apres  nous  avoir  exhortez  a  cheminer  si  sainctement  en  la  crainte  de  Dieu,  que  nous  ne  souffrions  point  comme  larrons,  paillars  et  meurtriers,  adiouste  quant  et  quant:  S'il  nous  fault  souffrir  comme  Chrestiens,  que  nous  glorifions  Dieu  du  bien  qu'il  nous  fait.  Ce  n'est  pas  sans  cause  qu'il  parle  ainsi.  Car,  qui  sommes-nous,  ie  vous  prie,  pour  estre  tesmoings  de  la  verite  de  Dieu,  et  procureurs  a  maintenir  sa  cause?  Voyci  des  povres  vers  de  terre,  des  creatures  pleines  de  vanite,  et  des  menteurs  pour  tout  potage:  et  Dieu  veult  que  nous  defendions  sa  verite,  qui  est  un  honneur,  lequel  n'appartient  pas  mesme  aux  Anges  de  Paradis.  Ceste  seule  consideration  ne  nous  doibt-elle  pas  bien  enflamber  a  nous  offrir  a  Dieu,  a  ce  qu'il  luy  plaise  nous  employer  a  une  chose  tant  honorable?  Toutesfois  plusieurs  ne  se  peuvent  tenir  de  se  rebeequer  contre  Dieu,  ou  pour  le  moins  de  faire  leurs  complainctes  de  ce  que  Dieu  ne  supporte  mieulx  leur  foiblesse.  C'est  merveilles,  disent-ils,  veu  que  Dieu  nous  a  choisis  pour  ses  enfans,  [f.  28]  comment  il  endure  que  nous  soyons  ainsi  foulez  et  tormentez  des  iniques.  Ie  respon:  Encores  qu'il  ne  nous  apparust  point  pourquoy  il  le  faict,  qu'il  debvroit  bien  avoir  ceste  authorite  envers  nous,  de  nous  faire  ranger  a  son  plaisir.  Mais  quand  nous  voyons  Iesus  Christ,  nostre  patron,  ne  debvons-nous  pas  estimer  a  grand  heur  d'estre  faicts  semblables  a  luy,  sans  enquerir  plus  oultre?  Cependant  Dieu  nous  monstre  des  causes  toutes  patentes  pour  lesquelles  il  veult  que  nous  soyons  persecutez.  Quand  il  n'y  auroit  que  ceste  remonstrance  que  fait  sainct  Pierre,  nous  sommes  bien  desdaigneux,  si  nous  n'y  acquiessons.  C'est  (1  Pierre  1,  7):  Puis  que  l'or  et  l'argent,  qui  ne  sont  que  metaulx  corruptibles,  sont  purgez  et  examinez  par  le  feu,  c'est  bien  raison  que  nostre  foy,  qui  surmonte  toutes  les  richesses  de  ce  monde,  soit  esprouvee.  Dieu  nous  pourroit  bien  couronner  du  premier  coup,  sans  nous  avoir  faict  soubstenir  nuls  combats:  mais  comme  il  veult  que  iusques  en  la  fin  du  monde  Iesus  Christ  regne  au  milieu  de  ses  ennemis,  aussi  il  veult  que  nous,  estans  meslez  parmi  eulx,  souffrions  leurs  oppressions  et  violences  iusques  a  ce  qu'il  nous  en  delivre.  Ie  scay  bien  que  la  chair  rechigne  quand  on  la  veult  amener  a  ce  poinct,  mais  si  fault-il  que  la  volonte  de  Dieu  soit  maistresse.  Si  nous  sentons  quelque  contradiction  en  nous,  il  ne  nous  en  fault  esbahir:  car  cela  nous  est  trop  naturel,  de  fuir  la  croix.