54:399  399  SERMON  II  400  nous  donne:  mais  si  faut-il  venir  a  ceste  cognoissance,  ou  Dieu  nous  a  monstre  que  nous  ne  serons  point  frustrez  de  nous  tenir  a  ce  qu'il  nous  dit,  et  que  Iesus  Christ  nous  est  un  bon  gage.  Et  ainsi  retenons  ces  deux  choses  ainsi  coniointes  comme  nous  les  voyons  ici  en  sainct  Paul,  et  que  ce  lien  nous  soit  sacre:  c'est  ascavoir  quand  nous  oyons  prescher  la  parole  de  Dieu,  que  nous  tendions  a  nostre  Seigneur  Iesus  Christ,  comme  c'est  le  but  auquel  nous  devons  estre  addressez:  et  que  nous  scachions  que  la  nous  avons  tout  ce  qui  appartient  a  l'esperance  de  nostre  salut.  Et  au  reste,  quand  on  nous  parlera  de  Iesus  Christ,  que  nous  n'imaginions  point  ie  ne  scay  quel  phantosme,  comme  font  les  Papistes,  mais  que  nous  venions  a  l'Evangile,  afin  que  la  il  nous  soit  cognu,  que  nous  scachions  a  quelle  fin  il  nous  est  donne  de  Dieu  son  Pere,  les  biens  qu'il  nous  a  apportez,  et  quel  est  son  office  envers  nous.  Quand  toutes  ces  choses-la  nous  sont  monstrees  par  l'Evangile,  cognoissons  que  ce  nous  est  un  vray  miroir  ou  nous  pouvons  contempler  nostre  Dieu  en  l'image  de  nostre  Seigneur  Iesus  Christ:  comme  sainct  Paul  en  parle  en  la  seconde  des  Corinthiens.  Voila  donc  pourquoy  il  dit  que  Dieu  a  revele  en  temps  opportun  le  salut  promis,  c'est  ascavoir  la  parole  en  sa  predication.  Or  il  adiouste.  Que  ceste  predication  luy  est  commise,  afin  qu'il  soit  receu  en  telle  qualite  comme  il  doit.  Car  il  pretend  de  parler  avec  authorite:  et  sans  cela  qu'eust-il  gagne  d'escrire?  Il  veut  donc  qu'on  recoyve  ce  qu'il  propose  comme  venant  de  Dieu,  et  non  point  d'un  homme  mortel.  Pour  ceste  cause  il  allegue  qu'il  ne  s'est  point  ingere,  mais  que  la  predication  luy  est  commise.  Et  de  faict,  ce  n'est  pas  aussi  a  nous  d'usurper  nul  estat  en  l'Eglise  de  Dieu.  Car  nul  ne  se  mettra  en  l'honneur,  dit  l'Apostre.  Voila  Iesus  Christ  qui  ne  s'est  point  avance  de  soy-mesme,  combien  qu'il  fust  excellent,  et  que  toute  authorite  luy  apparteinst:  il  n'est  point  venu  a  la  volee  pour  prendre  son  office,  mais  il  a  este  constitue  Sacrificateur  de  Dieu  son  Pere,  voire  avec  serment  solennel,  comme  il  est  dit  au  Psaume,  i'ay  iure,  et  ne  m'en  repentiray  point,  tu  es  sacrificateur  eternellement  selon  l'ordre  de  Melchisedec.  Voila  donc  nostre  Seigneur  Iesus  Christ  qui  declare  que  le  Pere  celeste  l'a  authorise.  Si  le  Maistre  de  la  maison  parle  ainsi,  le  Chef  des  Anges,  auquel  toutes  creatures  doyvent  hommage,  et  ployent  le  genouil  devant  luy,  que  sera-ce  de  nous  povres  vaisseaux  de  terre  et  fragiles,  de  nous  qui  ne  sommes  rien?  Oserons-nous  venir  pretendre  le  nom  de  Dieu,  sinon  que  nous  soyons  deuement  appelez?  Notons  bien  donc  que  sainct  Paul  n'allegue  point  ici  son  authorite  pour  estre  prise:  il  ne  se  vante  point  d'avoir  este  en  credit  quant  au  monde,