54:398  estoyent  requises  a  nostre  salut.  Les  Peres  anciens  ont  eu  les  sacrifices.  Mais  quoy?  Le  sang  d'un  taureau  ou  d'un  agneau  les  pouvoit-il  sanctifier  ni  reconcilier  avec  Dieu?  Il  est  bien  certain  que  non.  Ils  ont  eu  les  lavemens  :  mais  telles  ceremonies  leur  pouvoyent  elles  apporter  une  droite  iustice?  Il  s'en  faloit  beaucoup.  Ils  ont  eu  un  mediateur,  mais  c'estoit  un  homme  mortel,  suiet  a  toutes  infirmitez  comme  eux,  et  qui  avoit  besoin  de  prier  Dieu  pour  ses  fautes.  Ils  ont  eu  un  sanctuaire  visible,  mais  tout  cela  n'estoit  point  pour  les  amener  a  perfection.  Maintenant  nous  avons  le  Fils  de  Dieu,  auquel  toute  plenitude  de  bien  est  enclose:  il  est  nostre  Mediateur,  et  n'a  point  besoin  que  ses  fautes  luy  soyent  pardonnees,  d'autant  qu'il  est  pur  et  innocent,  et  qu'il  a  observe  toute  iustice.  Et  d'autre  coste,  il  n'est  point  incognu  a  Dieu,  d'autant  qu'il  est  venu  de  luy,  et  non  point  seulement  quand  il  a  este  constitue  nostre  Redempteur,  mais  qu'il  est  d'une  mesme  essence,  qu'il  est  nostre  Dieu  immortel.  Voila  donc  comme  en  la  personne  de  nostre  Seigneur  Iesus  Christ  nous  sommes  advancez  par  dessus  les  Peres  anciens.  Car  sa  mort  et  passion  a  este  le  sacrifice  eternel,  par  lequel  nous  sommes  acquittez  de  toutes  nos  offenses,  que  l'ire  et  la  malediction  de  Dieu  n'est  plus  sur  nous,  d'autant  qu'il  s'est  contente  d'un  tel  payement:  nous  avons  son  sang  qui  a  este  espandu  pour  nous  purger.  Quand  donc  nous  avons  toutes  ces  choses,  nous  voyons  comme  en  la  personne  de  nostre  Seigneur  Iesus  Christ,  ce  qui  avoit  este  anciennement  promis,  nous  est  auiourd'huy  priveement  revele.  Mais  cependant  sainct  Paul  nous  met  sa  predication:  comme  il  ne  nous  faut  point  aussi  separer  l'un  de  l'autre.  Car  il  y  a  un  lien  inseparable  entre  Iesus  Christ  et  l'Evangile:  que  si  nous  prenons  Iesus  Christ  tout  nud,  le  despouillant  de  sa  doctrine,  c'est  comme  l'aneantir:  ainsi  que  les  Papistes  en  font  une  idole.  Car  ils  diront  assez,  Iesus  Christ  Fils  de  Dieu  nostre  Redempteur:  mais  cependant  ils  ne  pensent  point  a  son  office,  et  ne  scavent  pourquoy  il  est  venu,  et  ne  le  veulent  point  scavoir  qui  plus  est.  Car  ils  s'enveloppent  en  ie  ne  scay  quelles  vaines  imaginations,  qu'ils  diront  bien,  Iesus  Christ  nous  a  este  envoye:  mais  (comme  i'ay  dit)  ils  ne  scavent  pourquoy,  d'autant  que  sa  vertu  ne  se  cognoist  point  sinon  par  son  Evangile,  lequel  ils  mesprisent  et  reiettent.  Nous  voyons  donc  pourquoy  sainct  Paul  derechef  nous  reduit  en  memoire  que  sans  la  predication  Iesus  Christ  ne  nous  profitera  de  rien.  Mais  aussi  d'autre  coste  notons  que  si  nous  ne  sommes  unis  a  Iesus  Christ  par  l'Evangile,  nous  effacons  entant  qu'en  nous  est  le  conseil  de  Dieu,  et  renversons  son  intention.  Il  est  vray  qu'il  nous  faut  estre  du  tout  certains  par  la  parole  que  Dieu