41:398  vos  affaires,  on  vous  ostera  le  sceptre  du  poing,  et  perdres  tout  vostre  credit.  O!  qu'on  tue,  qu'on  meurtrisse,  il  ne  sera  question  que  de  se  maintenir.  Nous  verrons  ce  qu'en  advient  tous  les  iours,  que  des  princes  feront  des  violences  et  des  cruautes,  les  plus  enormes  qu'on  scauroit  dire,  que  le  sang  sera  espandu  par  tout.  Ils  ne  craindront  point  de  meurtrir,  de  brusler,  ni  de  saccager,  pour  maintenir  leur  grandeur,  ou  bien  pour  s'eslever  encores  plus  haut  qu'ils  ne  font.  Voila  donc  comme  l'ambition  transporte  les  princes,  tellement  qu'ils  n'ont  plus  de  modestie,  ni  d'humanite,  non  plus  que  des  bestes  sauvages.  Or  toutesfois  nous  voions  ici  Darius  combien  qu'il  eust  este  pieque  et  irrite,  combien  qu'on  eust  use  de  cette  cautelle  de  luy  dire  que  Daniel  n'avoit  tenu  compte  de  la  loy  qu'il  avoit  faitte,  et  toutesfois  il  demande  de  le  sauver.  Nous  voions  donques  ici  en  Darius  un  bon  exemple  d'un  prince  qui  n'est  point  tellement  adonne  a  son  ambition,  qu'il  ne  retienne  encores  quelque  humanite,  mais  ce  pendant  nous  voions  un  prince,  qui  est  mol  et  effemine,  qu'il  ne  resiste  pas  comme  il  appartient  a  ses  princes  et  gouverneurs.  Car  quand  ils  luy  viennent  dire,  la  loy  des  Perseens  et  des  Medeens  est  telle,  voila  le  pauvre  homme  qui  craint  et  luy  semble  qu'il  pourroit  estre  despouille  de  son  autorite,  qu'il  est  desia  homme  ancien.  Et  puis  il  y  avoit  cette  ialousie,  que  nous  avons  touche  ici  devant,  entre  luy  et  Cyrus  son  gendre,  et  son  neveu.  En  cela  voions  nous,  qu'encores  que  Dieu  ait  mis  quelques  graces,  et  quelque  goust  de  sa  bonte  en  un  homme,  que  cela  s'escoule  tantost,  sinon  qu'il  luy  donne  force  et  vertu  pour  le  faire  perseverer,  il  est  bon  de  noter  cela.  Car  quand  nous  avons  receu  quelque  grace,  il  nous  semble  que  c'est  asses,  mais  l'escriture  saincte  nous  montre,  que  les  dons  de  Dieu  sont  divises,  et  puis  quand  nous  avons  receu  une  grace  de  Dieu,  nous  avons  besoin  de  le  prier,  qu'il  nous  en  donne  une  autre,  a  fin  de  persister  a  ce  qu'il  nous  aura  fait  commencer.  Ainsi  ce  n'est  point  sans  cause,  qu'il  est  dit,  que  l'Esprit  de  Dieu  est  l'Esprit  de  sagesse  et  d'intelligence,  l'Esprit  de  prudence  et  de  discretion,  l'Esprit  de  force  et  de  vertu,  l'Esprit  de  douceur  et  de  mansuetude,  l'Esprit  de  crainte  et  de  connoissance  de  Dieu,  ce  n'est  pas  (di  ie)  sans  cause,  que  tous  ces  titres  la  sont  attribues  a  l'Esprit  de  Dieu.  Et  pourquoy?  c'est  a  fin  que  quand  Dieu  nous  aura  fait  la  grace  de  nous  donner  quelque  bonne  affection,  il  nous  enflambe  de  tant  plus,  car  nostre  zele  se  pourroit  refroidis  sinon  qu'il  l'enflambast,  et  puis  nostre  inclination  naturelle  nous  pousse  tousiours  a  cela,  que  combien  que  Dieu  nous  ait  fait  bien  commencer,  que  tousiours  nous  irons  du  contraire  de  sa  volonte,  sinon  qu'il  nous  tienne  la  bride  pour  nous  faire  perseverer.  Et  de  ce  nous  en  avons  un  beau  miroer  en  la  personne