32:395  395  PSALMUS  CXLI.  396  loco  beneficii)  corripiat  me,  et  hoc  mihi  erit  pretiosum  unguentum  quod  caput  meum  non  laedet.  Hoc  membrum  secus  alii  exponunt,  Oleum  capitis  ne  frangat  caput  meum:  hoc  est,  ne  me  suis  blanditiis  exitialiter  demulceant  impii.  Ita  sub  olei  nomine  notari  volunt  pestiferas  adulationes,  quibus  nos  in  exitium  praecipitant  improbi,  dum  praetextu  dulcedinis  nos  magis  ac  magis  in  profundam  abyssum  demergunt.  Hoc  modo  plenior  esset  sententia,  Davidem  non  modo  esse  morigerum  et  docilem  suscipiendis  correctionibus,  sed  etiam  adulationes  fugere  non  secus  ac  noxios  Sirenum  cantus.  Et  certe  quamvis  primo  gustu  suave  sit  laudari,  quisquis  tamen  aures  assentationibus  praebuerit,  toto  corde  mox  hauriet  praesentissimum  venenum.  Caeterum  discamus  exemplo  Davidis  excutere  omnes  blanditias,  ad  quas  natura  sumus  nimium  propensi,  et  pervicaciam  exuere:  ne  castigationes,  quae  saluberrima  sunt  vitiis  nostris  remedia,  respuamus.  Adeo  enim  socordia  perire  magnam  hominum  partem  iuvat,  ut  qui  se  damnare  cogitur,  cupiat  tamen  mundi  suffragiis  absolvi.  Quorsum  hoc,  nisi  ut  torporem  conscientiae  obducens  sponte  se  exitio  devoveat?  5.  (Quia  adhuc.)  Tribus  modis  exponitur  hoc  membrum,  Quidam  sensum  hunc  eliciunt,  Quia  nihil  magis  proclive  est  quam  corrumpi  malis  exemplis,  Davidem  hoc  deprecari,  ne  in  malitiam  eorum  declinet.  Secundus  sensus  est,  Quia  David  eos  quidvis  improbe  machinari  videt,  petere  a  Domino  ut  ab  eorum  malitia  tutus  servetur.  Tertii  sic  reddunt,  Quando  video  esse  desperatos,  imprecor  quod  meriti  sunt,  ut  se  tandem  contra  eos  exserat  iusta  Dei  ultio.  Contrarius  tamen  sensus  videri  posset  aptior,  quod  obstinatio  eorum  non  impediat  tamen  Davidem  quo  minus  illis  bene  precari  pergat.  Nam  adverbium  adhuc  emphatice  inseritur.  Quid  si  etiam  vaticinetur  David  de  infausto  eorum  exitu?  ac  si  diceret,  Quamvis  nunc  lasciviant  impii,  ubi  paulisper  quieverit  ipse,  brevi  fore  ut  ipsorum  miserescat.  Et  certe  huc  potius  nos  deducit  verborum  contextus,  neque  enim  dicit,  Adhuc  oratio  mea  erit  in  malis  ipsorum,  sed  videtur  seorsum  dicere,  quia  adhuc:  quum  interposita  copula  deinde  adiungat,  et  oratio  mea  erit  in  malis  ipsorum.  Quia  ergo  timendum  erat  ne  una  cum  illis  evanesceret  David,  prudenter  animum  suum  suspendit,  ac  si  diceret,  Paulisper  adhuc  maneamus  integri,  et  tandem  horribili  clade  ferientur,  quae  mihi  et  omnibus  aliis  Dei  filiis  extorqueat  misericordiam.  6.  (Deiecti  sunt)  Consentiunt  omnes  fere  interpretes  in  mutando  verbi  modo.  Praeteritum  enim  tempus  accipiunt  loco  futuri,  deinde  resolvunt  in  modum  optativum,  Deiiciantur.  Mihi  videtur  dilucida  fore  mens  Davidis,  si  vertamus  hoc  modo,  Ubi  deiecti  fuerint  e  rupibus,  vel  in  loca  saxosa