8:394  que  nous  scachions  discerner  entre  la  vraye  religion  et  les  abus  ou  follies  des  [f.  22]  hommes,  mais  aussi  que  nous  soyons  bien  persuadez  de  la  vie  celeste  et  de  la  couronne  qui  nous  est  promise  la  hault,  apres  que  nous  aurons  combatu  yci  bas.  Cependant  notons  que  tous  ces  deux  poincts  sont  requis,  et  qu'on  ne  doibt  separer  l'un  d'avec  l'autre.  Il  nous  convient  donc  commencer  par  ce  bout,  de  bien  cognoistre  quelle  est  nostre  Chrestiente,  quelle  est  la  foy  que  nous  avons  a  tenir  et  suyvre,  quelle  est  la  reigle  que  Dieu  nous  a  donnee,  et  que  nous  soyons  si  bien  munis  de  telle  instruction,  que  nous  puissions  hardiment  condamner  toutes  les  faulsetez,  erreurs  et  superstitions  que  satan  a  introduictes  pro  corrompre  la  pure  simplicite  de  la  doctrine  de  Dieu.  Parquoy  on  ne  se  doibt  esbahir  si  on  ne  voit  auiourd'huy  gueres  de  gens  qui  soyent  disposez  a  souffrir  pour  l'Evangile,  et  que  la  plus  part  de  ceulx  qui  se  nomment  Chrestiens,  ne  scachent  que  c'est.  Car  tous  sont  quasi  nonchalans,  et  ne  tiennent  compte  d'ouir  ne  de  lire;  mais  ce  leur  est  assez  d'avoir  eu  quelque  petit  goust  de  la  foy  Chrestienne.  Voyla  pourquoy  il  y  a  bien  peu  d'arrest;  et  s'ils  sont  assaillis,  ils  se  trouvent  incontinent  esperdus.  Cela  nous  doibt  inciter  a  nous  enquerir  plus  diligemment  de  la  verite  de  Dieu  pour  en  estre  bien  certains.  Mais  encor  n'est-ce  pas  le  tout  que  nous  soyons  bien  instruicts  et  entendus.  Car  on  en  voit  qui  semblent  estre  quasi  du  tout  conficts  en  bonne  doctrine,  lesquels  toutesfois  n'ont  nul  zele  ni  affection  en  eulx,  non  plus  que  si  iamais  ils  n'eussent  rien  cogneu  de  Dieu,  sinon  par  quelque  fantasie  vollage.  Et  pourquoy  cela,  sinon  d'autant  qu'ils  n'ont  iamais  comprins  la  maieste  de  l'Escripture  saincte?  Et  de  faict,  si  nous,  tant  que  nous  sommes,  considerions  bien  que  c'est  Dieu  qui  parle  a  nous,  il  est  tout  certain  que  nous  serions