41:394  une  loy  qui  est  contre  Dieu  doit  estre  observee  ou  non.  Il  y  avoit  beaucoup  de  loix  au  pais  des  Perses  et  des  Medes,  les  observoit  on  pourtant?  Ceux-ci  mesme  desquels  nous  parlons,  d'autant  qu'ils  avoient  grand  autorite  au  pais,  estoient  adonnes  a  usures  et  rapines,  qu'il  ni  avoit  nulle  crainte  de  Dieu  en  eux,  ils  se  donnoient  licence  de  mal  faire.  Pensons  nous  qu'il  se  soient  gouvernes  selon  les  loix?  nenni,  mais  il  leur  sembloit  que  cela  n'estoit  rien,  et  vouloient  neantmoins  establir  une  loy  contre  Dieu,  pour  abolir  sa  maieste,  laquelle  ils  vouloient  estre  tellement  observee  qu'il  ni  eut  point  de  remission  pour  ceux  qui  la  transgressoient.  Et  voila  comme  on  fera  tousiours,  car  les  hommes  qui  ne  regardent  point  a  Dieu,  pour  luy  servir,  auront  tousiours  un  regard  mauvais,  pour  establir  leur  tirannie,  plustost  que  bon  zele  qu'ils  aient,  de  faire  garder  leurs  loix.  Quand  il  y  aura  une  loy  faitte  en  la  papaute,  qui  sera  contre  Dieu,  il  faut  qu'elle  s'observe  iusques  au  bout,  qu'on  pardonnera  plustost  un  meurtre,  ou  un  autre  vice  bien  enorme,  qu'on  ne  fera  d'avoir  mange  un  morceau  de  chair  au  vendredi,  qu'on  face  tout  ce  qu'on  voudra,  c'est  tout  un.  Qu'on  regarde  la  chose  en  soy,  on  verra  bien  que  ce  n'est  rien,  mais  cependant  s'il  se  fait  quelque  loy  contre  Dieu,  il  faudra  qu'elle  soit  gardee  a  la  rigueur,  il  ni  aura  nulle  remission,  et  faudra  qu'on  punisse  ceux  qui  n'auront  point  failli,  mesmes  a  leur  escient,  que  iamais  cela  ne  se  pardonnera.  Voila  comme  il  en  est.  Ainsi  donques  connoissons  que  ce  n'est  point  d'auiourd'hui,  que  les  ennemis  de  Dieu  exercent  cette  cruaute  a  l'encontre  des  fideles,  c'a  este  de  tout  temps.  Au  reste  nous  voions  encores  ici  une  malice,  en  ce  qu'ils  disent,  Daniel  estant  de  la  captivite  de  Iuda,  n'a  tenu  compte  de  toy.  Voila  une  calumnie  fause,  de  dire  a  Daniel  qu'il  n'a  tenu  compte  du  Roy,  car  nous  avons  veu  qu'il  s'est  trouve  fidele,  que  pour  cela  il  est  constitue  gouverneur  du  Royaume.  Que  combien  qu'on  l'eust  espie,  que  neantmoins  il  n'est  point  trouve  en  faute,  on  voit  doncques  la  foy  et  loiaute,  qu'il  a  garde  a  son  Roy,  et  en  tout  le  reste,  que  scauroit  on  demander  plus  de  luy?  et  sous  umbre  qu'il  a  prefere  Dieu  au  Roy  on  le  vient  accuser.  Or  voila  comme  nous  en  sommes,  aussi  bien  auiourd'huy  on  dira,  que  nous  sommes  sedicieux  et  mutins,  que  nous  ne  demandons  sinon  a  troubler  le  monde,  et  mettre  confusion  par  tout,  et  la  raison  c'est,  d'autant  que  nous  voulons  servir  a  Dieu  selon  sa  parole.  Cela  ne  nous  sera  point  permis,  les  hommes  ne  veullent  point  souffrir  que  Dieu  domine  par  dessus  eux,  et  pourtant  voila  qui  est  cause  de  telle  haine.  Or  toutesfois  si  les  hommes  avoient  cest  advis  de  dire,  est  il  raison  que  nous  voulions,  que  Dieu  ne  soit  rien  au  pris  de  nous,  ou  bien  que  nous  soions  egales  a  luy?  Il