8:393  393  LE  SECOND  SERMON,  CONTENANT  EXHORTATION  A  SOUFFRIR  PERSECUTION  POUR  SUYVRE  IESUS  CHRIST  ET  SON  EVANGILE.  SUR  LE  PASSAGE  QUI  EST  AU  TREIZIEME  CHAPITRE  DES  HEBRIEUX:  Allons  hors  des  tentes,  apres  Christ,  portans  son  opprobre.  Toutes  les  exhortations  qu'on  nous  pourra  faire  de  souffrir  patiemment  pour  le  nom  de  Iesus  Christ  et  pour  la  querelle  de  l'Evangile  n'auront  point  de  lieu,  si  nous  ne  sommes  bien  asseurez  de  la  cause  pour  laquelle  nous  combatons.  Car  quand  il  est  question  de  quicter  la  vie,  il  fault  bien  que  nous  soyons  resolus  et  certains  pourquoy  c'est.  Et  telle  constance  ne  peut  estre  en  nous,  sinon  qu'elle  soit  fondee  en  certitude  de  foy.  Vray  est  qu'il  s'en  trouvera  d'aucuns  qui  s'exposeront  follement  a  la  mort  pour  soustenir  quelques  folles  opinions  et  resveries  qu'ils  auront  conceues  en  leur  teste:  mais  une  telle  impetuosite  merite  plustost  d'estre  tenue  pour  frenesie  que  pour  zele  Chrestien.  Comme  aussi  de  faict  il  n'y  a  ne  fermete  ne  sens  rassis  en  telles  gens  qui  se  iectent  ainsi  a  l'estourdie.  Quoy  qu'il  en  soit,  il  n'y  a  que  la  bonne  cause  qui  face  que  Dieu  nous  advoue  pour  ses  martyrs:  car  la  mort  est  commune  a.  tous,  et  les  enfans  de  Dieu  seront  condamnez  a  telle  ignominie  et  tormens  comme  les  brigans:  mais  Dieu  les  discerne,  entant  qu'il  ne  peut  renier  sa  verite.  Or  il  est  requis  que  de  nostre  part  nous  ayons  certain  tesmoignage  et  infallible  de  la  doctrine  laquelle  nous  soubstenons.  Pourtant,  comme  i'ay  dict,  nous  ne  povons  estre  esmeus  ne  touchez  a  bon  escient  par  quelques  exhortations  qu'on  nous  face  de  souffrir  persecution  pour  l'Evangile,  s'il  n'y  a  une  vraye  certitude  de  foy  imprimee  en  nos  cueurs.  Car  de  hazarder  nostre  vie  a  l'adventure,  cela  n'est  point  naturel.  Et  quand  nous  le  ferions,  ce  ne  seroit  que  temerite,  non  pas  vertu  Chrestienne.  Finalement  Dieu  n'approuvera  rien  de  tout  ce  que  nous  ferons,  si  nous  ne  sommes  bien  persuadez  que  c'est  pour  luy  et  pour  sa  querelle  qu'on  nous  moleste,  et  que  le  monde  nous  est  ennemi.  Or  quand  ie  parle  d'une  telle  certitude,  ie  n'enten  pas  seulement