25:393  393  REDITUS  AD  HISTORIAM.  394  Subscribit  autem  Moses  vaticinio  Iacob,  qui  dixit  Zebulon  habitaturum  in  portu  maris,  ut  naviget  mercaturae  causa:  Issachar  vero,  quia  magis  otio  delectabitur,  desidem  fore  et  ignavum,  ut  redimendae  pacis  causa,  tributum  pendere  non  recuset.  Quod  sequitur  additum  existimo,  ac  si  dixisset  Moses,  locorum  distantiam  obstaculo  non  fore  quominus  una  cum  aliis  Ierosolymam  ascenderent,  ad  colenda  pietatis  exercitia.  Nam  quo  remotiores  erant  a  templo,  frigere  apud  eos  poterat  legalis  cultus  studium.  Quamvis  ergo  in  extremis  finibus  habitent,  dicit  Moses  venturos  nihilominus  ut  Deo  sacrificent.  Per  populos  quidam  intelligunt  alias  tribus:  quod  minime  consentaneum  videtur:  alii  vero  exteras  gentes,  ad  quas  accessum  dabant  commercia.  Ego  vero  simpliciter  interpretor,  quamvis  itineris  longitudo  suadeat  domi  quiescere,  se  tamen  mutuo  cohortaturos,  ut  in  magnis  catervis  ad  templum  se  conferant.  Finis  versus  potest  esse  causae  redditio:  quasi  dictum  esset,  eo  magis  attentos  fore  ad  cultum  Dei,  quia  ab  ipso  locupletati,  studebant  laudem  referre.  Et  certe  foedae  ingratitudinis  signum  est,  non  stimulari  Dei  beneficiis,  ut  quo  liberalius  nobiscum  agit,  alacrius  enitamur  ad  reddendam  gratiarum  actionem.  Simul  docet  Moses  minime  illis  graves  fore  itineris  sumptus  in  magnis  opibus.  Quamvis  enim  non  adeo  pinguis  esset  regio:  situs  tamen  valde  commodus  erat  ad  ipsos  locupletandos.  Ita  hic  ubi  dicitur:  Sugent  maris  affluentiam,  subaudienda  est  antithesis  inter  fructus  agrorum,  et  multiplices  proventus  ex  mercaturis:  eodem  spectant  reconditi  thesauri  arenae.  Nam  quod  exponunt  quidam,  tantos  illis  fore  thesauros,  ut  recondant  in  arena:  alii  vero,  arenas  illic  auri  et  argenti  feraces  fore:  alii,  collecturos  quae  mare  evomet,  insipidum  est.  Quum  ergo  alii  ex  suis  fundis  ditescerent,  concinna  figura  dicit  Moses,  arenas  in  terra  Zabulon  refertas  esse  occultis  thesauris,  propter  adventitium  quaestum.  20.  Et  ad  Gad  dixit.  In  benedictione  tribus  Gad  tantum  fit  mentio  partis  haereditariae,  quam  adeptus  fuerat  extra  sortem.  Dei  ergo  beneficium  laudat:  quia  Gaditis  amplam  habitationem  concesserit:  verbum  enim  Dilatandi  ad  terrae  amplitudinem  refertur.  Caeterum  quoniam  in  illa  extremitate  trans  Iordanem  hostibus  vicini  erant,  bellicosos  fore  pronunciat:  et  hoc  sensu  comparat  eos  leoni  qui  praedam  rapit  nunc  a  capite,  nunc  a  brachio.  Quia  igitur  non  tam  pacata  erat  illa  sedes,  quam  aliqua  alia  regio  in  medio  terrae  Chanaan,  tutos  et  salvos  fore  pronunciat  sua  violentia.  Etsi  autem  non  admodum  laeta  est  conditio,  exerceri  continuis  bellis:  in  illo  tamen  incommodo  non  spernenda  est  Dei  gratia,  formidabiles  esse  hostibus,  et  virtute  pollere,  qua  non  modo  repellant  hostilem  impetum,  sed  ultro  incurrant  ad  praedam.  Si  quis  obiiciat