9:392  illum  Deum  Israel  esse  patrem  verbi?  Si  affirmarit,  nulla  (ut  dixi)  erit  inter  nos  controversia:  sin  autem  negarit,  sic  probabo.  Quaero  ab  eo:  Utrum  patriarchae  et  prophetae  invocaverint  unicum  illum  Deum  Israel?  Neque  id  puto  eum  negaturum.  Sed  quando  frustra  invocatur  Deus  sine  mediatore  j  quaeritur  per  quem  [pag.  53]  mediatorem  invocarint  illum?  Aperte  quaeso  hic  respondeat  (nam  vana  est  illa  tergiversatio:  Non  necesse  est  illum  semper  occurrere):  volo  enim  doceri,  an  habuerint  mediatorem  necne.  Per  Christum  respondeat  oportet.  Per  Christum,  inquam  (est  enim  ipse  Christus  vere  filius  Dei,  et  verus  Deus),  ut  filium,  an  ut  Deum?  Absit  ut  Christus  fuerit  illis  mediator  ut  Deus.  Si  igitur  fuit  illis  mediator  quatenus  filius,  sequitur  ergo,  quod  unicus  ille  Deus  Israel  est  verus  et  naturalis  pater  Christi,  ut  verbi,  sine  respectu  alicuius  personae.  Quare,  qui  asserunt  Christum  esse  filium  Dei  respectu  illius  personae  sophisticae,  magnam  illi  quidem  iniuriam  faciunt,  tum  unico  illi  Deo  Israel,  tum  etiam  Christo  eius  filio.  Sic  enim  asserentes,  fatentur  se  non  minus  ignorare  verum  patrem  quam  verum  filium,  in  quorum  pura  cognitione  consistit  vita  aeterna,  ut  ipse  Christus  patrem  alloquens  ait  :  Haec  est  vita  aeterna,  ut  cognoscant  te  solum  verum  Deum,  et  quem  misisti  Iesum  Christum.  Quomodo  enim  solum  verum  Deum  patrem  cognoscent,  qui  negant  illum  habere  synonymiam  cum  essentia,  quae  est  solus  verus  Deus?  Quomodo  etiam  cognoscent  Iesum  Christum,  qui  contra  autoritatem  scripturarum  faciunt  eum  filium  illius  sophisticae  personae?  Licet  enim  sophistae  Christum  filium  Dei  praedicent,  quum  tamen  [pag.  54]  unicum  illum  Deum  sterilem  et  infoecundum  sibi  fabricati  sint,  non  verum  ac  naturalem,  sed  supposititium  filium  intelligant  necesse  est  Quasi  unicus  ille  Deus  Israel  nequierit  sibi  filium  gignere,  nisi  illa  diabolica  persona  sibi  illum  supposuerit  Quis  unquam  talia  fando,  audierit?  Quis  non  videt,  optimi  viri  Dei,  hoc  diabolico  commento  totam  trinitatem  adulterasse  sophistas,  Deum  illum  foecundum,  sterilem  facientes  :  patrem,  personam  illam  sophisticam  :  verbum,  filium  eiusmodi  personae  :  spiritum  sanctum  quoque  procedentem  ex  ambabus  illis  personis  fictitiis  et  adulterinis?  Quapropter  haud  improprie  in  nos  torqueri  posset  illud  Danielis  vaticinium:  Adorabunt  Deum  quem  non  cognoverunt  patres  eorum.  Quis  enim  vel  patriarcharum,  vel  prophetarum,  vel  apostolorum  cognovit  unquam  eiusmodi  Deum,  qui  sibi  filium  non  genuerit?  Turcarum  Deus  is  est,  non  Christianorum.  Quaeritur:  Dum  contendunt  Christum  esse  filium  Dei  respectu  personae,  an  intelligant  eum  esse  natura  Dei  filium  necne  ?  Si  affirmarint,  sinant  quaeso  tandem  valere  illum  respectum  personalem,  et  libere  cum  scripturis  pronuncient  eum  vere  filium  Dei:  sin  autem  negarint,  sciant  universam  scripturam  adversum  se