8:392  et  qu'ils  apprennent  a  preferer  sa  gloire  a  toutes  choses  du  monde.  Ie  desire  que  tous  les  povres  fideles,  qui  sont  en  la  Papaulte,  entendent  ceci;  comme  le  prophete  Ieremie  estant  en  Ierusalem,  envoyoit  ceste  mesme  lecon  au  peuple  qui  estoit  detenu  captif  en  Babylone.  Si  la  tyrannie  du  Pape  et  des  siens  est  dure  et  cruelle,  les  Iuifs  de  ce  temps-la  en  avoyent  bien  leur  part:  et  toutesfois  il  leur  est  commande  de  despiter  l'idolatrie  de  Chaldee,  au  propre  gergon  du  pais;  car  ce  n'est  pas  raison,  que  la  tyrannie  des  hommes  rompe  ou  diminue  le  droict  que  Dieu  ha  d'estre  honore  de  nous.  Il  n'y  a  yci  exemption  ne  privilege  pour  grans  ou  pour  petis,  pour  riches  ou  povres.  Que  tous  doncques  ployent  le  col.  Que  le  povre  craigne,  de  peur  que  s'il  dit:  Ie  ne  scay  que  faire,  Dieu  ne  luy  responde:  Ie  ne  scay  aussy  que  faire  de  toy.  Que  les  riches  ne  s'enyvrent  pas  en  leurs  aises,  comme  en  croupissant  sur  leur  lie;  mais  plustost  qu'ils  apprennent,  a  l'exemple  de  sainct  Paul,  de  tenir  pour  ordure  et  dommage  tout  ce  qui  les  divertit  ou  retarde  de  vivre  Chrestiennement.  Cependant  n'oublions  pas  aussi,  de  nostre  coste,  ce  que  fay  touche  au  commencement,  c'est  que  nous  applicquions  ceci  a  nostre  instruction,  pour  estre  tousiours  prests,  quelque  part  que  nous  soyons  transportez,  ou  quelque  chose  qui  nous  advienne,  de  persister  en  la  pure  confession  de  nostre  foy,  detestans  toutes  superstitions,  idolatries  et  abus  qui  contrarient  a  la  verite  de  Dieu,  obscurcissent  son  honneur,  et  renversent  son  service.