6:392  materia  formae  subest.  Nam  quum  voluntas  velut  materia  sit,  ad  recipiendam  formam  apta  et  habilis,  ante  renovationem  male  formata  est,  naturae  pravitate.  Ubi  autem  spiritu  Dei  ad  bonitatem  renovatur,  quasi  alteram  formam  induit.  Velle  igitur  habet  homo:  ut  autem  bonum  velit,  a  Deo  praevenitur.  Haec  enim  posteriora  verba  illic  habentur.  Non  dicit,  ut  velle  possit:  sed  praesentem  effectum  assignat  gratiae;  quemadmodum  et  aliquanto  ante,  quum  diceret,  tam  reparari  quam  praeparari  voluntatem,  ut  bona  sit  quae  mala  erat.  Quid  autem  Chrysostomus?  Sic  comitem  gratiae  voluntatem  constituit,  ut  ab  hac  pendeat  illius  efficacia.  Neque  aliter  Pighius  accipit.  Quid  ergo  ex  verborum  similitudine  fucum  facit,  in  tanta  sententiae  diversitate?  Quod  si  nondum  acquiescit,  meminerint  lectores  eius,  quod  [pag.  222]  alibi  retulimus,  pro  magno  absurdo  Augustinum  ducere,  si  quis  dicat,  non  sufficere  Dei  misericordiam,  nisi  adsit  hominis  voluntas.l)  Non  igitur  volentis,  neque  currentis,  ut  totum  detur  Deo:  qui  voluntatem  hominis,  et  praeparat  adiuvandam,  et  adiuvat  praeparatam;  qui  nolentem  praevenit,  ut  velit;  volentem  subsequitur,  ne  frustra  velit.  At  illo  superiore  loco  innuitur,  non  tolli,  sicut  assero,  liberum  arbitrium  per  gratiam;  sed  vulneratum  apprehendi,  ut  dometur  corrigaturque  ad  obediendum  Deo.  Quasi  ego  substantiam  voluntatis  redigi  in  nihilum  oportere,  vel  docuerim  unquam,  vel  etiam  somniaverim.  De  qualitate  enim  semper  loquutus  sum,  in  qua  hic  scriptor  correctionem  dum  requirit,  quid  omnino  a  me  dissentaneum  habet?  Sed  haec  sunt  stratagemata  factitii  nostri  Herculis,  qui  monstra  subinde  sibi  fabricatur,  quibus  devictis  in  sinu  suo  triumphet.  Atque  ut  omnia  inter  se  respondeant,  triumphale  hoc  sibi  carmen  occinit:  his  verbis  nos  compellari  ab  Augustino:  Audi  haeretice,  stulte,  et  inimice  fidei:  Opera  liberi  arbitrii  bona,  quae  ut  fiant,  praeparantur  per  gratiae  praeventum,  nullo  liberi  arbitrii  merito,  ipsa  faciente  gubernante  perficiente,  ut  in  libero  arbitrio  abundent,  non  damnamus.  Adeo  et  caecus  est  et  improbus,  ut  non  cernat,  haec  omnia  perinde  scripta  esse,  ac  si  quis  ex  nobis  dictasset;  et  aliis  mentem  iudiciumque,  ne  cernant,  sua  protervia  tollere  se  posse  confidat.  Ad  reliqua  deinde  mea  argumenta,  sed  pari  qua  hactenus  felicitate,  refellenda  pergit.  Caeterum,  ad  ea  quae  ex  Ieremia  cito:  Timorem  nominis  mei  dabo  in  corda  eorum  ut  non  recedant  a  me;  item:  Dabo  eis  cor  novum,  ut  timeant  me  cunctis  diebus  (Ier.  32,  39.  40),  abunde  responsum  esse  praefatur,  ne  operam  in  re  supervacua  consumat.  Ego  autem  non  alteram  responsionem  audivi,  nisi  quod  fortiter  his  verbis  refragatus  est.  Ut  enim  a  Domino  non  1)  Enchir,  ad  Laurentium.