55:392  quas  iuste  poenas  irrogat.  Plato  quidem  imperite:  at  Iacobus  puniendi  ius  et  officium  Deo  relinquens,  tantum  culpam  ab  eo  avertit.  Hic  locus  docet,  ita  innumeris  Dei  beneficiis,  quae  ex  eius  manu  quotidie  percipimus,  affici  nos  debere,  ut  nihil  cogitemus  nisi  in  eius  gloriam  :  quaecunque  vero  aut  in  mentem  nobis  veniunt,  aut  ab  aliis  ingeruntur,  minus  consentanea  cum  eius  laude,  toto  pectore  exhorreamus.  Pater  luminum  vocatur  Deus,  quasi  omnis  et  praestantiae  et  bene  compositi  ordinis.  Et  quum  mox  subiicit  nullam  in  eo  esse  conversionis  obumbrationem,  perseverat  in  metaphora,  ne  Dei  splendorem  metiamur  solis  irradiatione  quae  nobis  apparet.  18*  Is  sua  voluntate,  ete.  Eius  quam  praedicavit  divinae  bonitatis  praecipuum  nunc  specimen  in  medium  adducit:  nempe  quod  nos  regeneravit  in  vitam  aeternam.  Hoc  inaestimabile  beneficium  unusquisque  fidelium  in  se  sentit:  ergo  bonitas  Dei  omnibus  experimento  comperta  tollere  debet  contrariam  opinionem.  Quum  Deum  volentem,  aut  sponte  sua  nos  genuisse  dicit,  significat  nulla  externa  causa  fuisse  inductum:  quemadmodum  saepe  voluntas  et  consilium  Dei  hominum  meritis  opponi  solent.  Quid  enim  magni  esset,  si  negaret  Deum  ad  id  fuisse  coactum?  Plus  ergo  quiddam  exprimit,  quod  Deus  pro  suo  beneplacito  nos  genuerit,  atque  ita  sibi  fuerit  causa.  Unde  sequitur,  naturale  esse  Deo  benefacere.  Caeterum  hic  locus  docet,  quemadmodum  gratuita  fuit  nostra  electio  ante  mundum  conditum,  ita  nos  mera  Dei  gratia  illuminari  in  notitiam  veritatis:  ut  vocatio  electioni  respondeat.  Docet  scriptura  nos  gratis  adoptatos  fuisse  a  Deo,  antequam  nasceremur:  Iacobus  autem  hic  plus  quiddam  exprimit,  nos  ius  adoptionis  consequi,  quoniam  gratis  quoque  nos  vocat  Deus.  Praeterea  hinc  discimus  proprium  esse  Dei  officium,  spiritualiter  nos  gignere.  Nam  quod  idem  adscribi  interdum  videtur  evangelii  ministris,  non  aliter  valet  nisi  quia  per  illos  agit  Deus:  et  fit  quidem  per  illos,  ut  solus  nihilominus  agat.  Genitura  nomen  significat  nos  fieri  novos  homines,  ut  priorem  naturam  exuamus  quum  efficaciter  vocamur  a  Deo.  Addit  quomodo  nos  regeneret  Deus,  nempe  per  sermonem  veritatis:  ut  sciamus  non  alia  ianua  posse  nos  ingredi  in  regnum  Dei.  Ut  essemus  primitiae  quaedam.  Ttva  aut  Quaedam,  similitudinis  est  nota,  ac  si  dixisset,  nos  quodammodo  esse  primitias.  Porro  id  ad  paucos  fidelium  restringi  non  debet,  sed  pertinet  ad  omnes  communiter.  Nam  quum  homo  inter  omnes  creaturas  excellat,  Dominus  fideles  suos  ex  aliorum  grege  eligit  ac  segregat  sibi  in  sanctam  oblationem.  Haec  non  vulgaris  est  nobilitas,  in  quam  filios  suos  Deus  extollit.  Quare  merito  dicuntur  eximi  tanquam  primitiae,  dum  in  illis  instauratur  Dei  imago.