54:390  des  roseaux  branslans  a  tous  vents:  et  mesmes  notons  que  nous  ne  pouvons  estre  reputez  fideles,  sinon  en  nous  tenans  du  tout  a  Dieu.  Car  sainct  Paul  a  voulu  exclure  tout  ce  qui  est  procede  des  hommes,  quand  il  dit  que  la  foy  emporte  cognoissance  de  la  verite.  Car  qu'est-ce  que  les  hommes  nous  pourront  mettre  en  avant  de  leur  propre?  Il  est  dit  qu'il  n'y  a  que  vanite  en  eux.  Et  ainsi  ils  nous  tromperont  tous  les  coups,  sinon  qu'ils  puissent  protester  que  ce  qu'ils  nous  enseignent,  ils  l'ont  receu  d'enhaut,  et  qu'ils  dispensent  de  main  en  main  la  pure  verite,  qui  est  une  chose  si  saincte  qu'il  n'est  point  licite  d'y  faire  aucun  meslinge.  Il  faut  donc  que  la  verite  de  Dieu  se  presche  en  telle  sorte  que  rien  n'y  soit  adiouste,  mais  qu'elle  demeure  pure  comme  elle  est.  Voila  a  quoy  sainct  Paul  nous  a  voulu  amener,  et  sur  tout  quand  il  dit  que  ceste  verite-ci  est  selon  la  crainte  de  Dieu,  avec  l'esperance  de  la  vie  eternelle.  Il  faut  que  nous  soyons  edifiez  en  bien,  et  que  nous  apprenions  d'estre  un  peuple  sanctifie  a  Dieu  :  et  pour  ce  faire  que  nous  cherchions  quelle  est  la  fin  de  l'Evangile  :  c'est  que  nous  ne  soyons  point  en  ce  monde  comme  povres  bestes,  que  nous  ne  cherchions  point  seulement  d'estre  nourris  et  vestus  pour  nous  arrester  a  ceste  vie  caduque,  mais  que  nous  soyons  elevez  en  cest  heritage  immortel  qui  nous  est  promis.  Voila  donc  a  quoy  Dieu  a  pretendu  quand  il  nous  envoye  son  Evangile,  c'est  de  nous  retirer  de  ce  monde,  afin  que  nous  tendions  a  luy,  voire  tellement  que  nous  ne  doutions  point  que  l'heritage  de  la  vie  immortelle  ne  nous  soit  appreste,  comme  il  nous  a  este  acquis  si  cherement  par  nostre  Seigneur  Iesus  Christ.  Et  afin  d'y  parvenir,  que  nous  cheminions  en  la  crainte  de  nostre  Dieu  en  toute  purete,  comme  sainct  Paul  en  parle  ici.  Et  si  nous  voyons  que  Dieu  n'a  rien  cherche  que  nostre  salut,  quand  ii  nous  a  envoye  son  Evangile,  qui  est  la  souveraine  felicite  et  la  perfection  de  tous  biens,  que  cela  nous  incite  a  nous  y  assuiettir  d'un  tant  meilleur  courage,  et  de  nous  ranger  au  troupeau  de  nostre  Seigneur  Iesus  Christ,  afin  qu'il  soit  nostre  Pasteur,  et  qu'il  nous  gouverne.  Or  nous-nous  prosternerons  devant  la  face  de  nostre  bon  Dieu,  etc.