47:39  39  IN  EVANGELIUM  IOANNIS  40  causa  sic  loquutum  esse.  Maior  eius  erat  modestia  et  pietas  quam  ut  adeo  severa  castigatione  opus  haberet.  Deinde  non  peccabat  ipsa  sciens  et  volens,  sed  Christus  periculo  tantum  occurrit,  ne  alio  quam  oportet  trahatur  matris  dictum,  quasi  ex  eius  praescripto  miraculum  postea  ediderit.  4.  Quid  tibi  mecum  mulier  ?  Graece  ad  verbum  est,  Quid  tibi  et  mihi?  Sed  Graecis  tantundem  valet  haec  loquutio  ac  Latinis,  Quid  tibi  mecum?  Vetus  interpres  multos  fefellit,  qui  putarunt  Christum  negare,  vini  defectum  pertinere  ad  suam  et  matris  curam.  Atqui  ex  secundo  membro  colligere  promptum  est,  quam  id  remotum  sit  a  Christi  sensu.  Curam  enim  hanc  suscipit,  ac  suarum  esse  partium  testatur,  quum  addit  horam  suam  nondum  venisse.  Utrumque  ergo  coniungi  debet,  Christum  tenere  quid  facto  sit  opus,  et  tamen  matris  admonitu  hac  in  re  nihil  facturum.  Insignis  certe  locus.  Cur  enim  matri  praecise  negat  quod  liberaliter  aliis  quibuslibet  toties  postea  concessit?  Deinde  cur  simplici  repulsa  non  contentus,  eam  in  vulgarem  mulierum  ordinem  cogit,  nec  iam  matris  nomine  dignatur?  Hac  Christi  voce  palam  constat  denuntiari  hominibus,  ne  nominis  materni  honorem  superstitiose  in  Maria  evehendo,  quae  Dei  propria  sunt  in  ipsam  transferant.  Sic  ergo  matrem  Christus  alloquitur,  ut  perpetuam  ac  communem  saeculis  omnibus  doctrinam  tradat,  ne  immodicus  matris  honor  divinam  suam  gloriam  obscuret.  Porro  quam  necessaria  haec  admonitio  fuerit,  ex  crassis  foedisque  superstitionibus,  quae  postea  sequutae  sunt,  plus  satis  notum  est.  Facta  est  enim  Maria  regina  coeli,  spes,  vita,  et  mundi  salus.  Denique  eo  progressus  est  vesanus  furor,  ut  Christi  propemodum  nudati  spoliis  eam  ornarent.  Quumque  has  exsecrabiles  in  filium  Dei  blasphemias  damnamus,  maligni  et  invidi  vocamur  a  papistis.  Imo  improbe  calumniantur,  sanctae  virginis  honorem  hostiliter  a  nobis  impugnari.  Quasi  vero  non  habeat  quantum  illi  honoris  debetur,  nisi  dea  fiat:  aut  hoc  illi  sit  honorificum,  sacrilegis  titulis  ornatam  in  Christi  locum  subrogari.  Atrocem  ergo  illi  Mariae  iniuriam  faciunt,  quando,  ut  mentitis  eam  laudibus  deforment,  Deo  eripiunt,  quod  suum  est.  Nondum  venit  hora  mea.  Significat  se  hactenus  non  incogitantia  vel  torpore  cessasse.  Interea  subindicat  sibi  rem  curae  futuram,  ubi  opportunitas  advenerit.  Itaque  sicut  matrem  insimulat,  quod  intempestive  festinet,  ita  rursum  miraculi  spem  facit.  Utrumque  agnoscit  sancta  virgo,  neque  enim  amplius  eum  compellat.  Et  quum  ministros  admonet  ut  quidquid  ille  praeceperit  faciant,  novum  quiddam  sperare  se  ostendit.  Caeterum  haec  doctrina  latius  patet,  quoties  Dominus  nos  tenet  suspensos,  auxiliumque  suum  differt,  non  ideo  torpere,  sed  potius  opera  sua  sic  moderari,  ut  nihil  nisi