40:39  39  PRAELECTIONES  40  interdum  variae  formae,  sed  quae  inter  se  respondent.  Sic  etiam  poterat  lector  hic  errare,  quasi  in  uno  capite  exstarent  diversae  facies:  ideo  dicit  propheta  ab  excelso  fuisse  extentas,  vel  divisas.  Hic  ergo  significat  capitum  diversitatem.  Quantum  ad  alas,  dicit  fuisse  extentas:  et  modum  simul  exprimit,  nempe  quod  duae  alae  coniunctae  fuerint,  vel  colligatae,  ut  unumquodque  animal  coniunctum  esset  proximo.  Cohaerebant  igitur  inter  se  alis  quatuor  animalia:  hoc  propheta  intelligit.  Quantum  ad  reliquas  alas  dicit  corpora  illis  texisse:  et  ita  videmus  aliquam  esse  similitudinem  inter  hoc  spectaculum,  et  quod  oblatum  fuit  Isaiae,  quemadmodum  refert  cap.  6.  Cur  autem  alae  fuerint  simul  coniunctae  sursum,  ratio  videtur  satis  clara,  quod  scilicet  Deus  sic  habeat  diversos  motus,  et  agitet  terram,  ut  tamen  quae  videntur  inter  se  confligere  optime  consentiant.  Coniunctio  igitur  fuit  sursum,  hoc  est  ipsius  Dei  respectu:  quia  in  terra  apparet  saepe  horribilis  confusio:  et  opera  Dei,  quemadmodum  attigi,  videntur  inter  se  pugnare:  sed  si  quis  oculos  in  coelum  attollat,  videbit  optime  congruere  quae  speciem  repugnantiae  ostendunt  infra,  hoc  est  quamdiu  subsidimus  in  terra  et  praesenti  rerum  statu.  Postea  addit,  12.  Et  unumquodque  ad  (contra)  faciem  suam  ambulabat:  secundum  quod  erat  illuc  spiritus  ad  ambulandum  (hoc  est  secundum  quod  ferebat  spiritus  ad  ambulandum)  ambulabant,  non  revertebantur  ambulando.  Hic  repetit  propheta  fuisse  directum  iter  animalibus  cuique  versus  vel  contra  faciem  suam:  tertio  idem  paulo  post  dicet:  neque  supervacua  est  haec  narratio,  quia  ut  heri  diximus,  et  paulo  post  rursus  dicendum  erit,  vix  possumus  adduci,  ut  demus  gloriam  sapientiae  Deo.  Sicuti  enim  sumus  hebetes,  ita  putamus  Deum  miscere  omnia  inconsiderate,  quasi  esset  in  tenebris.  Quoniam  ergo  videntur  nobis  tortuosae  Dei  actiones,  necesse  fuit  saepius  hoc  membrum  repeti,  nempe  angelos  incedere  contra  faciem  suam,  hoc  est  esse  attentos  ad  obsequium.  Nam  et  filius  qui  volet  morem  gerere  patri,  vel  servus  domino,  saepe  tamen  tumultuatur,  et  perturbat  quod  agendum  erat.  Quoniam  in  creaturis  apparet  semper  aliquid  confusum,  ideo  propheta  tam  diligenter  inculcat  angelos  ambulare  versus  faciem  suam,  hoc  est  ita  ut  tendant  ad  suum  scopum,  neque  declinent  huc  vel  illuc.  Quod  autem  de  angelis  pronuntiat,  referri  debet  ad  ipsum  Deum:  quia  eius  consilium  non  fuit  hic  attollere  angelicam  sapientiam,  sed  proponit  Dei  ministros  nobis,  ut  illic  cernamus  quod  unum  est  ex  principiis  fidei  nostrae,  Deum  scilicet  ita  moderari  suas  actiones,  ut  nihil  illic  sit  contortum,  vel  erraticum.  Addit  quocunque