24:39  39  COMMENTARIUS  IN  EXODI  CAP.  III.  pro  visibili  specie,  qua  eius  maiestas  obtegebatur,  positum  est.  7.  Et  dixit  Iehova.  Antequam  partes  liberandi  populi  Deus  Mosi  iniungat,  pluribus  verbis  ad  spem  victoriae  et  prosperi  eventus  eum  erigit.  Scimus  enim  ut  dubitatio  animos  cura  et  anxietate  retardet  ac  debilitet.  Non  potuit  igitur  Moses  negotium  strenue  vel  suscipere,  vel  aggredi,  nisi  coelestis  auxilii  fiducia  instructus.  Ergo  Deus  se  ducem  fore  profitetur,  ut  talibus  auspiciis  fretus  ad  militandum  intrepide  se  accingat.  Unde  elicienda  nobis  est  communis  doctrina:  quantumvis  lenti  naturaliter  ac  haesitabundi  ad  praestanda  Deo  obsequia  simus,  ubi  tamen  de  successu  nos  reddit  certiores,  fas  non  esse  quidquam  detrectare:  quia  nullus  potest  esse  acrior  stimulus  hac  promissione,  manum  eius  semper  fore  paratam  ubi  sequimur  quo  vocat.  In  hunc  finem  Deus  praefatur  antequam  vocationis  faciat  mentionem,  ut  Moses  de  felici  exitu  factus  certior,  alacriter  ad  opus  descendat.  Porro  ubi  Deus  redemptionis  fidem  in  gratuito  foedere,  ac  proinde  in  mera  sua  liberalitate  fundavit,  nunc  alterum  argumentum  sumit  a  sua  iustitia:  quia  fieri  non  potest  quin  mundi  iudex  miseris  et  calamitosis  subveniat,  ubi  indigne  opprimuntur,  praesertim  ubi  opem  eius  implorant.  Hoc  in  genere  verum  est  :  Deum  iniustae  cuiuslibet  crudelitatis  fore  vindicem,  sed  peculiare  eius  auxilium  a  fidelibus  sperandum  est,  quos  in  fidem  patrociniumque  recepit.  Itaque  merito,  postquam  dixit,  adoptione  populi  se  moveri  ne  eum  in  extrema  necessitate  deserat,  simul  adiungit  secundam  confirmationem,  se  venisse  auxilio  ad  cohibendam  tyrannidem,  quia  clamorem  inopum  exaudierit.  Hoc  quidem  semel  animandi  Mosis  causa  dictum  est:  sed  non  vulgari  solatio  lenire  debet  nostros  omnium  dolores,  ubi  sub  iniusto  onere  gemimus.  Neque  enim  Deus  qui  tunc  oculatus  fuit,  hodie  caecutit,  quin  observet  omnes  iniurias  ac  supplicum  misereatur.  Quanquam  autem  hebraismus  est  in  verbi  repetitione:  Videndo  vidi,  significat  tamen,  ubi  poenam  differt  ac  suspendit,  conniventiam  hanc  non  obstare  quominus  e  coelis  speculetur  hominum  facta,  ut  tandem  opportuno  tempore  iudex  appareat.  Notatur  enim  continua  animadversio:  quasi  diceret,  se  tunc  quoque  vidisse  dum  quiescendo  visus  fuit  populi  aerumnas  negligere.  Clamorem  se  audisse  dicens,  oblique  perstringit  populi  socordiam:  quem  non  legimus  ante  clamasse  quam  rebus  extremis  ac  deploratis  coactus  fuerit.  Itaque  nihil  mirum  si  prope  contabuerit  sub  malis  suis,  antequaai  subveniretur,  quia  vix  post  longum  tempus  exortae  fuerunt  preces.  Quanquam  ne  tunc  quoque  serio  precatos  esse  verisimile  est  (ut  ante  dixi),  sed  Deus  clementiae  suae  et  fidei  maiorem  habuit  rationem  quam  iustae  et  solidae  eorum  praeparationis.  His  quidem  verbis  Dei  invocationem  nobis  commendat