2:39  [CO  2.40]  postea  in  cultum  aut  obsequium  Dei  moliantur,  impensum  illi  ferre  nequeunt:  quia  non  ipsum,  sed  cordis  sui  figmentum  potius  et  somnium,  pro  ipso  colunt.  Hanc  pravitatem  diserte  notat  Paulus  (Rom.  1,  22),  infatuatos  esse  dicens,  quum  sapientes  esse  appeterent.  Prius  dixerat  evanuisse  in  suis  cogitationibus;  sed  ne  quis  eos  culpa  eximeret  subiicit,  merito  eos  excaecari,  quia  sobrietate  non  contenti,  sed  plus  sibi  arrogando  quam  fas  sit,  tenebras  ultro  accersunt,  imo  inani  ac  perverso  fastu  se  ipsos  infatuant.  Unde  sequitur,  non  esse  excusabilem  eorum  stultitiam  cuius  causa  est  non  vana  modo  curiositas,  sed  libido  plus  sciendi  quam  par  sit,  cum  falsa  confidentia.  [Inst  1.4.2.]  Quod  autem  David  impios  et  vesanos  dicit  (Psal.  14,  1  et  53,  1)  sentire  in  cordibus  suis,  non  esse  Deum,  primo  ad  eos  restringitur  qui  suffocata  naturae  luce,  consulto  se  ipsos  obstupefaciunt,  ut  paulo  post  iterum  videbimus.  Quemadmodum  multos  videmus,  postquam  audacia  peccandi  et  consuetudine  obduruerint,  furiose  repellere  omnem  Dei  memoriam  quae  tamen  illis  sponte  a  naturae  sensu  intus  suggeritur.  Iam  quo  magis  detestabilem  eorum  furorem  reddat,  eos  inducit  praecise  negantes  Deum  esse,  quamvis  essentiam  illi  suam  non  adimant,  sed  quia  spoliantes  eum  suo  iudicio  et  providentia  otiosum  coelo  includunt.  Nam  quum  nihil  minus  Deo  conveniat  quam  abiectam  mundi  gubernationem  fortunae  permittere,  caecutire  ad  hominum  scelera,  ut  impune  lasciviant:  quisquis  exstincto  coelestis  iudicii  metu  secure  sibi  indulget,  Deum  esse  negat.  Atque  haec  iusta  Dei  vindicta  est,  pinguedinem  obducere  cordibus,  ut  impii,  postquam  oculos  suos  clauserunt,  videndo  non  videant.  Et  David  alibi  (Psal.  36  2,  ibid.  10,  11)  optimus  suae  sententiae  est  interpres,  ubi  dicit  timorem  Dei  non  esse  prae  oculis  impiorum;  item  sibi  in  maleficiis  superbe  plaudere,  quia  Deum  non  aspicere,  sibi  persuadeant.  Quanquam  ergo  coguntur  aliquem  Deum  agnoscere,  eius  tamen  gloriam  exinaniunt,  potentiam  illi  detrahendo;  sicut  enim  (teste  Paulo  2  Tim.  2,  13)  Deus  se  ipsum  abnegare  nequit,  quia  sui  perpetuo  similis  manet,  ita  isti  mortuum  et  inane  idolum  fingendo,  Deum  negare  vere  dicuntur.  Ad  haec  notandum  est,  quamvis  luctentur  cum  proprio  sensu,  et  Deum  non  solum  inde  excutere,  sed  in  coelo  quoque  abolere  cupiant,  nunquam  tamen  eo  usque  invalescere  stuporem,  quin  retrahat  Deus  ipsos  interdum  ad  suum  tribunal.  Sed  quia  nullo  metu  retinentur  quo  minus  violenter  contra  Deum  ruant:  quamdiu  illos  ita  rapit  caecus  impetus,  brutam  Dei  oblivionem  in  ipsis  regnare  certum  est.  [Inst  1.4.3.]  Sic  inane  illud  patrocinium  quod  superstitioni  suae  praetexere  multi  solent,  evertitur.  Putant  enim  stadium  qualecunque  religionis,  quamlibet  praeposterum,  satis  esse;  sed  non  animadvertunt,  veram  religionem  ad  Dei  nutum,  ceu  ad  perpetuam  regulam,  debere  conformari,  Deum  vero  ipsum  semper