1:39  [CO  1.  39]  dictio:  Victuros  diu  super [p. 66]  terram,  qui  parentes  eo  quo  debent  honore  prosequuti  fuerint,  velut  singularis  cuiusdam  commendationis  vice,  quae  declaret  quam  grata  sit  Deo  huius  mandati  observatio,  et  torporem  nostrum  excitet  et  exhortetur;  simul  ut  ingrati  filii,  qui  mutuam  parentibus  vicem  ac  gratiam  referre  neglexerint,  certissimam  maledictionem  expectent.  [OS  50]  MANDATUM  VI.  Non  occides.  Hoc  est  :  quandoquidem  timeri  Deum  a  nobis  atque  amari  oportet,  ne  quem  ullo  genere  offensionis  laedamus,  ne  cui  iniurii  simus,  ne  quem  lacessamus,  ne  cui  vim  afferamus;  quin  potius,  si  quis  est  in  nobis  timor  atque  amor  Dei,  omnibus,  amicis,  inimicis,  benevolentiam  exhibeamus,  utrisque  placere  studeamus,  utrisque,  si  quo  in  discrimine  sunt,  auxiliarem  manum  afferamus,  utrisque  benefici  esse,  quantum  possumus,  contendamus  (Matth.  5).  MANDATUM  VII  Non  fornicaberis.  Huc  pertinet  ut,  quoniam  timeri  a  nobis  atque  amari  Deum  oportet,  caste  ac  continenter  in  omni  vita  nostra  omnia  componamus,  loquamur,  agamus,  et  quando  virginitas  singulare  est  donum  Dei,  videant  singuli  quid  sibi [p. 67]  datum  sit  (Matth.  5.  Eph.  5.  1  Cor.  6.  Matth.  19.  1  Cor.  7).  Nam  qui  hoc  verbum  non  capiunt,  remedium  habent  carnis  suae  impuritati,  oblatum  sibi  a  Domino;  eo  nisi  utantur,  cum  Deo  pugnant  ac  eius  ordinationi  resistunt.  Neque  dicant  (ut  multi  hodie  dicunt):  se  Dei  auxilio  adiutos  omnia  posse.  Dei  enim  auxilium  non  nisi  iis  adest,  qui  in  viis  suis  ambulant  (Psal.  91),  hoc  est  in  sua  vocatione,  a  qua  se  isti  contra  Dei  voluntatem  subducere  conantur.  In  hac  pervicacia  ne  Deum  auxiliatorem  expectent,  sed  meminerint  potius  eius  quod  dictum  est:  Dominum  Deum  tuum  non  tentabis  (Deut.  6.  Matth.  4).  Hoc  vero  Deum  tentare  est,  contra  naturam,  quae  ab  eo  nobis  indita  est,  niti  ac  praesentia  eius  dona  spernere.  Quod  isti  non  modo  faciunt,  sed  matrimonium  etiam,  quod  Deus  instituere  dignatus  est,  quod  in  omnibus  honorabile  pronunciavit,  quod  Christus  Dominus  noster  sua  praesentia  sanctificavit,  quod  primo  suo  miraculo  cohonestare  dignatus  est  (Gen.  2.  Hebr.  13.  Ioan.  2),  pollutionem  vocare  audent,  tantum  ut  qualemcunque  coelibatum  miris  encomiis  tollant.  Quasi  vero  non  aliud  coelibatus  sit,  aliud