6:389  DE  LIBERO  ARBITRIO.  qui  disputat,  contra  se  ostium  claudit  misericordiae  Dei.  At  Solomon  non  praecipit,  sed  affirmat  hominis  esse  facultatem  praeparandi  cordis  (Prov.  16,  1).  Et  hic  habes  expositionem  Pighio  dignam.  Temerariam  hominum  confidentiam  Solomon  illic  deridet,  qui  nihil  non  agitant  consilii,  nihil  non  moliri  audent  sine  Deo:  quum  tamen  ne  verbum  quidem  emittere,  quod  multo  minus  est,  nisi  per  ipsum  queant.  Hominis,  inquit,  est  cor  praeparare,  et  Domini  est  gubernare  linguam.  Quis  non  videat,  ironicam  esse  humanae  arrogantiae  descriptionem,  quae  summa  omnia  sibi  usurpat,  quum  ne  minimum  quidem  in  potestate  habeat?  Pighius  autem  ex  eo  praeveniri  ab  homine  Dei  gratiam  colligit.  Iam  quas  fingit  praeparationes  Deo  gratas  esse,  ex  Davide  probat:  Desiderium  enim  pauperum  audivit  Deus;  praeparationem  cordis  eorum  audivit  auris  tua  (Psal.  10,  17).  Utinam  vero,  quando  ad  vertendum  non  est  idoneus,  bonum  interpretem  sequi  maluisset,  quam  ad  inscitiam  hoc  quoque  mali  addere,  ut  errori  pertinaciter  adhaereret.  Ad  verbum  sic  habet  David:  Desiderium  pauperum  audivit  Deus;  praeparabis  cor  eorum;  audiet  auris  tua.  Pighius,  vestigiis  interpretis  [pag.  218]  non  boni  nec  fidi  insistens,  ad  praeparationem  torquet,  qua  homines  certent  cum  Dei  gratia.  Vides  quam  apposita  sit  ad  rem  probatio.  Et  tamen  non  minore  truculentia  stuppas  istas  proiicit,  quam  si  fulmina  de  coelo  vibraret.  Subiicit,  causam  hanc  adduci,  cur  spoliatus  regno  fuerit  Roboam,  quod  non  direxit  cor  suum  ut  obediret  Domino  (2  Chron.  12,  14).  Si  praeparare,  inquit,  cor,  ad  quaerendum  Deum,  nihilo  magis  potest  homo,  quam  digito  coelum  tangere,  quid  hoc  specialiter  de  Roboam  scriptura  commemorat,  velut  causam  reprobi  sensus,  quod  aeque  et  piorum  et  impiorum  est  omnium?  Atque  hunc  nodum,  quidquid  comminiscar,  insolubilem  esse  nihil  dubitat.  Respondeo,  non  dici  causam  reiectionis,  quod  per  se  non  habuerit  flexibile  cor,  quod  sine  spiritus  directione  ad  serviendum  Deo  proprio  naturae  motu  inclinaret,  quod  nos  omnium  pariter  hominum  commune  esse  tradimus,  sed  quod  re  ipsa  non  direxerit  ad  Deum  cor:  quod  impiis  proprium  est,  ac  peculiare.  Hoc  vitium  usitatum  est  Pighio,  dum  res  diversissimas  non  distinguit,  nihil  non  postea  miscere  et  confundere.  Cordis  duritia  et  pravitas,  qua  fit,  ut  ad  malum  propendeamus,  ad  bonum  simus  impotentes,  universalis  est  generis  humani  morbus,  donec  spiritu  suo  remedium  adhibuerit  Dominus.  Ubi  autem  cor  in  uno  carneum  formavit,  in  altero  lapideum,  sicut  a  natura  erat,  reliquit:  iam  multum  inter  eos  est  discriminis.  Ille  cor  flexile  habet  ad  Dei  obedientiam,  imo  Dei  legem  habet  inscriptam  in  corde,  ut  eius  iustitiae,  toto  voluntatis  affectu,