8:388  contraire.  Prenons  le  cas  quant  a  eulx  qu'il  ne  leur  en  chaille  :  si  ay-ie  tousiours  a  insister  sur  la  profession  exterieure  qu'ils  font.  Or  il  appert  qu'ils  se  couvrent  d'un  masque  de  prebstre.  Pour  deuement  celebrer  la  Cene  du  Seigneur,  il  leur  convenoit  se  separer  du  ranc  des  idolatres,  a  ce  qu'ils  n'eussent  en  cela  rien  de  commun  avec  eulx.  Au  lieu  de  ce  faire,  ils  se  vont  comme  emmatriculer,  et  font  semblant  d'estre  un  membre  du  corps.  Et  sur  cela,  ils  nous  feront  ressembler  aux  heretiques  anciens  qui  ont  condamne  l'usage  des  sacremens  pour  les  vices  des  hommes,  comme  si  nous  regardions  aux  vices  particuliers,  et  non  plustost  a  l'estat.  Ie  passe  ceci  briefvement:  mais  si  peu  que  i'en  touche,  n'est  que  trop  pour  convaincre  une  impudence  si  vilaine.  Toutesfois,  s'ils  sont  si  hebetez  que  de  n'en  rien  sentir,  la  parolle  de  Dieu  nous  doibt  suffire.  Comme  quand  le  Seigneur  dit  par  Ieremie  (4,  1):  Israel,  si  tu  te  convertis,  retourne  toy  a  moy.  Lesquels  mots  expriment  en  quelle  simplicite  nous  debvons  proceder  avecques  Dieu,  sans  tourner  a  l'entour  du  pot.  Et  voyla  pourquoy  sainct  Paul  proteste  (Actes  14,  15)  qu'il  est  envoye  pour  convertir  les  infideles  de  leurs  vanitez  au  Dieu  vivant:  comme  s'il  disoit  que  ce  n'est  rien  faict  de  changer  un  mal  accoustume  a  des  autres  feintises,  mais  qu'il  fault  rondement  abolir  les  superstitions,  a  fin  que  la  vraye  religion  soit  establie  en  sa  purete:  car  sans  cela,  les  hommes  ne  viennent  point  droict  a  Dieu,  mais  chancellent  et  varient,  ne  scachans  de  quel  coste  ils  se  doibvent  tourner.  Il  y  en  a  d'autres  qui  viennent  iusques  la  de  quicter  la  Messe,  mais  ils  vouldroyent  bien  retenir  quelques  autres  loppins  de  ce  qu'on  appelle  service  de  Dieu,  a  fin  de  n'estre  point  tenus  (comme  ils  disent)  du  tout  pour  gens  profanes.  Et  possible  qu'il  y  en  a  qui  y  vont  de  bonne  affection:  pour  le  moins  ie  suis  content  de  le  croire:  mais  quelque  desir  qu'ils  ayent,  si  n'est-ce  pas  a  dire  qu'ils  j  tiennent  droicte  reigle,  ne  bonne  mesure.  Aucuns  diront:  Nous  povons  bien  aller  aux  baptesmes,  car  il  n'y  a  point  d'idolatrie  manifeste:  comme  si  le  Sacrement  n'estoit  pas  la  barbouille  en  tant  de  sortes,  qu'il  semble  [f.  17]  que  Iesus  Christ  soit  encor  en  la  maison  de  Pilate,  pour  estre  soufflete  et  expose  a  tout  opprobre.  Au  reste,  sur  ce  qu'ils  disent  que  c'est  pour  monstrer  qu'ils  ne  sont  pas  gens  sans  religion,  qu'on  en  demande  a  leurs  consciences,  elles  respondront  que  c'est  pour  contenter  les  Papistes,  et  faire  la  mine  a  fin  d'eviter  persecution.  Les  autres  espient  le  temps  pour  ne  point  rencontrer  de  Messes,  et  toutesfois  viennent  au  temple,  a  fin  qu'on  pense  qu'ils  y  ont  este.  Aucuns  se  reservent  seulement  les  vespres  pour  leur  part.  Mais  ie  vouldrois  bien  scavoir  d'eulx,  s'ils  n'estiment  rien  qu'on  encense  les  idoles,  qu'une  priere  solennelle  soit  fondee  sur  l'intercession  et  merite