6:387  .RESPONSIO  CONTRA  PIGHIUM  Sodoma  iactae  fuissent  istae  virtutes,  quas  vidisti,  in  cilicio  et  cinere  poenitentiam  egissent  (Matth.  11,  21.  23).  Nam  si  absoluta,  inquit,  efficacique  voluntate  noluit  dare  Deus  poenitentiam  Sodomae,  Tyro  et  Sidoni,  an  daturus  erat,  si  illic  edidisset  sua  miracula?  Et  cur  potius  ob  miracula  illis  gratiam  resipiscendi  dedisset,  quam  civitati  suae,  ubi  eadem  miracula  designabat?  Respondeo,  minime  in  his  verbis  Christum  respicere,  vel  unde  emanet  poenitentia,  vel  cur  his  potius,  quam  illis,  arcano  Dei  consilio  detur:  sed  simpliciter  ab  effectis  sumere  hanc  comparationem,  quod  reliquae  illae  quas  nominabat,  urbes,  quibus  doctrina  et  miracula  defuissent,  plus  habiturae  essent  excusationis  coram  Deo,  quam  Capernaum,  quod  deliberata  nequitia,  et  impia  [pag.  215]  scelerataque  rebellione  obduratum,  tot  ac  tam  praeclaris  et  doctrinae  et  signorum  monitionibus  nihil  flecteretur.  Quasi  diceret:  nullam  hactenus  fuisse  gentem  tam  durae  aut  indomitae  cervicis,  tam  ferrei  cordis  aut  obstinati,  quae  non  commoveretur  signis  illis,  quae  apud  Capernaitas  contemptui  ludibrioque  habebantur.  Quod  si  affirmationem  illam  pertinacius  urgeat  Pighius,  iam  pridem  egissent  poenitentiam:  respondeat  iam  mihi,  curnam  urbes  illas  non  dignatus  fuerit  idoneis  modis  hortari  ad  poenitentiam,  quas  sciebat  suae  exhortationi  non  defuturas?  Si  quid  sentit,  sentire,  opinor,  debet,  suis  ipsius  tricis  teneri  se  nunc  implicitum.  Sed  valeant  ineptae  illae  cavillationes  :  quum  evidenter  constet  non  aliud  voluisse  Christum  tali  loquendi  genere,  quam  si  quis  hodie  sic  loquatur:  neminem  esse  Turcam  tam  durum  rebellemque  Deo,  aut  tam  a  pietate  aversum,  qui  non  iam  olim  fractus  fuisset,  si  ea  legisset,  audisset,  vidisset,  quibus  tamen  non  potuit  corrigi  Pighius.  Post  haec,  ut  nostrae  facultatis  esse  probet,  tam  praeparare  corda  nostra  Deo  quam  ei  ad  bonum  nos  provocanti  acquiescere,  longum  ex  integro  praeceptorum  catalogum  retexit.  Nihil  certe  dubium  est,  centies  nos  victos  esse,  si  Dei  praeceptis  vires  hominum  metiri  libeat.  At  istud,  inquit,  delirare  est,  ad  ea  hortari  homines,  quibus  praestandis  pares  non  sint.  Verum  ab  hac  contumelia  se  tuetur  Deus,  qui  optimam  sibi  esse  iubendi  causam  declarat,  etiam  si  penes  hominem  non  sit  implendi  facultas.  Quanquam  operae  pretium  est,  ex  iis,  quae  adducit,  quaedam  nominatim  referre  et  expendere.  Apud  Ieremiam,  inquit,  docemur,  qualiter  se  efficaciter  praeparare  ad  Dei  gratiam  homines  possint,  dum  sic  dicit:  Scrutemur  vias  nostras  et  revertamur  ad  Dominum;  levemus  corda  nostra  cum  manibus  in  coelum,  dicentes:  Nos  impie  egimus,  etc.  (Lament.  3,  40).  Odisse,  inquit  Pighius,  ac  detestari  veterem  vitam,  contritoque  corde  ad  Dominum  [pag.  216]  confugere,  poenitere  ex  corde,  et  vera  fide  petere  misericordiam,  haec