8:386  s'abandonner  a  tous  venans:  mais  la  Messe  parochiale  est  l'idolatrie  la  plus  commune  de  toutes≫  Tant  y  a  que  ceulx  yci  la  fardent  de  ceste  couleur,  qu'elle  retient  encores  quelque  trace  de  la  Cene  de  Iesus  Christ:  voire  comme  si  un  brigand  valoit  mieulx  quand  il  sera  revestu  de  la  despouille  de  celuy  auquel  il  a  coupe  la  gorge,  et  qu'il  sera  monte  sur  son  cheval.  Nous  cerchons,  disent-ils,  la  Cene  de  Iesus  Christ:  puisque  nous  ne  la  povons  avoir  pure  en  la  tyrannie  en  laquelle  nous  sommes,  il  nous  fault  [f.  14]  contenter  de  ce  residu,  en  attendant  que  Dieu  y  mette  la  main.  Voyla  une  belle  excuse!  D'autant  qu'ils  n'ont  point  le  droit  usage  et  entier  de  la  Cene,  par  maniere  de  provision  ils  protestent  qu'ils  ne  tiennent  point  Iesus  Christ  pour  Sacrificateur  eternel  et  unique,  et  qu'il  cerchent  toutes  les  sepmaines  un  nouveau  sacrifice  pour  effacer  leurs  pechez.  Car  tout  cela  est  en  la  Messe  parochiale  autant  qu'en  une  Messe  de  sainct  Nicolas  ou  des  trespassez.  Ils  font  semblant  d'adorer  une  idole,  et  se  vantent  de  cercher  Iesus  Christ:  et  afin  qu'ils  ne  combatent  point  contre  Dieu  sans  espee  ni  bouclier,  ils  mettent  en  avant  l'authorite  de  cestuy-ci  et  de  cestuy-la:  comme  si  l'absolution  d'un  homme  les  exemptoit  qu'ils  ne  soyent  condamnez  de  Dieu.  Ie  laisse  a  dire  qu'ils  ne  font  que  mentir  en  amenant  ceulx  qu'ils  amenent  pour  leurs  advocas.  Mesme  qu'ainsi  fust  qu'un  sainct  personnage  eust  pour  ung  temps  pense  que  ce  ne  fust  pas  si  grand  mal  d'aller  a  la  Messe  parochiale,  si  depuis  il  a  cogneu  ce  qui  en  estoit,  tant  plus  de  foy  doibton  adiouster  a  la  condamnation  qu'il  en  aura  faicte  apres,  d'autant  qu'on  veoit  que  la  vertu  de  Dieu  l'a  contrainct  a  cela,  et  qu'il  s'est  trouve  vaincu  en  ce  qu'il  tenoit  au  paravant.  Mais  que  fault-il  yci  barbouiller?  Cuident-ils  rembarrer  Dieu  par  l'opinion  ou  le  dire  d'un  homme  mortel?  Nous  scavons  qu'il  n'y  a  que  la  seule  verite  qui  regne  en  son  iugement  sans  acception  de  personnes.  Or  le  faict  est  tel,  que  la  Messe  parochiale  est  instituee  pour  sacrifier  Iesus  Christ,  et  faire  appoinctement  avecques  Dieu  tant  pour  les  vivans  que  pour  les  morts,  et  qu'un  morceau  de  pain  est  la  adore  comme  si  c'estoit  le  Fils  de  Dieu.  Ie  n'espluche  point  les  choses  par  le  menu;  il  y  a  mille  autres  infections,  mais  ie  pren  seulement  le  plus  gros.  Quo  ceulx  qui  font  semblant  d'y  accorder  lavent  leurs  mains  tant  qu'ils  vouldront,  si  ne  seront-ils  pas  a  la  fin  plus  iustes  que  Pilate.  Mais  c'est  merveilles  que  ces  bons  parochiens,  quand  ce  viendra  a  Pasques,  vont  cercher  une  chapelle  a  l'escart,  ou  quelque  moine  demi  Chrestien  leur  fera  une  Cene  bastarde.  Si  la  Messe  parochiale  approche,  comme  ils  disent,  de  la  Cene"  de  Iesus  Christ,  pourquoy  ne  s'y  tiennent-ils?  Mais  quand  ils  y  auront  este  tous  les  dimanches  de  l'an  pour  bien  participer  au  sa-  25