52:386  nutu  solo  nos  traheret  Christi  minister.  Nunc  autem  ne  moderatae  quidem  exhortationes,  ne  dicam  sana  consilia,  excutiendae  nostrae  tarditati  sufficiunt,  nisi  accedat  maior  reprehensionum  et  obiurgationum  vehementia.  Cum  omni  lenitate.  Valde  necessaria  exceptio.  Nam  vel  suo  ipsae  impetu  concidunt  redargutiones,  vel  in  fumum  abeunt,  nisi  doctrina  fulciantur.  Sunt  enim  tam  exhortationes  quam  reprehensiones  adiumenta  doctrinae  tantum:  ideoque  sine  ea  parum  sunt  validae.  Cuius  rei  exemplo  sunt  qui  fervore  tantum  et  acrimonia  pollent,  solida  autem  doctrina  non  sunt  muniti.  Strenue  enim  se  fatigant,  magnos  edunt  clamores,  tumultuantur:  idque  sine  profecftu,  quia  aedificant  absque  fundamento.  Loquor  de  bonis  alioqui,  sed  parum  eruditis  et  nimium  fervidis.  Nam  qui  ad  oppugnandam  sanam  doctrinam  conferunt  quidquid  habent  vehementiae,  longe  sunt  nocentiores,  et  indigni  quorum  hic  fiat  mentio.  In  summa,  Paulus  vult  reprehensiones  fundatas  esse  in  doctrina,  ne  merito  spernantur  tanquam  futiles.  Secundo  acrimoniam  vult  lenitate  temperatam  esse.  Nihil  enim  difficilius  est  quam,  ubi  semel  incaluimus,  modum  imponere  nostro  fervori.  Iam  ubi  nos  rapit  impatientia,  sine  profectu  contendimus.  Praeterquam  enim  quod  ludibrio  est  nostra  asperitas,  irritat  etiam  populi  animos.  Adde  quod  acres  et  severi  homines  ut  plurimum  tolerare  nequeunt  eorum,  quibuscum  agunt,  duritiem,  nec  multa  taedia  et  indignitates  devorare  sustinent,  quae  tamen  concoquenda  nobis  sunt,  si  prodesse  cupimus.  Proinde  adhibeatur  severitati  hoc  lenitatis  condimentum:  ut  illam  appareat  ex  placido  animo  prodire.  3.  Nam  erit  tempus.  Ex  ipsa  hominum  pravitate  ostendit  quam  solliciti  debeant  esse  pastores.  Brevi  enim  fore  ut  exstinguatur  evangelium  intereatque  ex  hominum  memoria,  nisi  summo  studio  adnitantur  pii  doctores  ipsum  tueri.  Interea  autem  dum  est  aliqua  Christi  reverentia,  utendum  occasione  significat:  ac  si  ingruente  procella  quispiam  diceret  non  esse  remisso  laborandum,  sed  gnaviter  festinandum:  quia  mox  non  eadem  futura  sit  opportunitas.  Quum  dicit  sanam  doctrinam  non  recepturos,  significat  non  modo  fastidium  et  contemptum  fore  sanae  doctrinae,  sed  etiam  odium.  Et  sanam  doctrinam  suo  more  appellat  ab  effectu,  quae  vere  ad  pietatem  nos  instituit.  Eandem  paulo  post  nominat  veritatem,  ac  si  diceret  sinceram  ac  genuinam  tractationem  verbi  Dei.  Et  fabulis  opponit,  hoc  est,  commentis  inutilibus,  quibus  corrumpitur  evangelii  simplicitas.  Primum  hinc  discamus,  quo  maior  vulgo  est  hominum  protervia  ad  spernendam  Christi  doctrinam,  eo  magis  intentos  esse  debere  ad  eandem  asserendam  pios  ministros,  et  eo  studiosius  instare  ut  salva  maneat.  Neque  id  modo,  sed  sua  quoque  sedulitate  praevenire  25