41:386  ce  que  nostre  Seigneur  avoit  ordonne  en  la  Loy,  de  ce  temps.  Nous  avons  auiourd'huy  le  semblable  aux  sacremens,  car  si  nous  demourons  ici  bas,  quand  le  baptesme  est  administre,  c'est  a  dire  que  nous  soions  tellement  amuses  a  ces  choses  basses  et  corruptibles,  que  nous  ne  soions  point  esleves  au  ciel,  pour  connoistre  que  nostre  lavement  git  au  sang  de  nostre  Seigneur  Iesus  Christ,  que  nostre  renouvellement  git  en  sa  mort  et  resurrection.  Si  nous  n'avons  ce  regard  la,  dequoy  nous  profite  le  Baptesme?  de  condemnation,  comme  de  fait  nous  le  sentirons  a  la  verite,  si  nous  n'en  faisons  autrement  nostre  profit.  Autant  en  est  il  de  la  Cene,  quand  nous  serons  ainsi  abrutis,  comme  les  Papistes,  que  nous  adorerons  un  morceau  de  pain,  que  nous  en  ferons  une  idole,  que  nous  voudrons  avoir  Dieu  au  milieu  de  nous,  quand  nous  avons  veu  un  morceau  de  pain,  qui  nous  sera  monstre.  Et  que  sera  ce?  voila  Iesus  Christ  qui  est  defigure.  Nous  le  deschirons,  entant  qu'en  nous,  et  le  mettons  en  pieces  et  en  loppins,  quant  nous  attribuons  une  telle  autorite  aux  elemens  corruptibles  de  ce  monde,  que  de  dire  qu'il  y  faille  cercher  le  Royaume  celeste.  Mais  quand  nous  venons  a  la  Cene,  et  que  nous  l'appliquons  a  son  droit  usage,  ainsi  qu'il  nous  a  este  ordonne  par  le  fils  de  Dieu,  alors  nous  n'inventons  rien  de  nous-mesmes,  nous  suivons  la  pure  parole  de  Dieu,  ainsi  qu'en  a  fait  Daniel.  Et  pourtant  quant  il  est  dit  en  ce  passage,  qu'il  a  tourne  les  yeux  vers  Ierusalem,  sachons  qu'il  n'a  point  invente  de  soy,  ne  de  son  Esprit,  une  devotion  folle,  mais  qu'il  a  eu  vraie  certitude,  que  Dieu  le  commandoit  ainsi,  et  qu'il  a  conneu  a  la  verite,  pourquoy  le  temple  avoit  este  edifie  et  basti.  Puis  qu'ainsi  est  donc  que  nous  en  demourions  la,  c'est  a  dire  quand  nous  prierons  Dieu,  que  nous  ne  soions  point  agites  de  nos  folles  inventions,  pour  dire,  et  pourquoy  cela  me  sera  il  bon?  Nenni  non,  mais  que  cette  sobriete  nous  retienne  pour  dire,  Dieu  a  commande  que  nous  facions  ainsi,  il  le  faut  donc  faire.  Il  y  a  encores  ici  une  circonstance,  qu'il  nous  faut  noter.  C'est  a  scavoir  que  le  temple  estoit  destruit  et  rase  pour  lors,  et  neantmoins  Daniel  ne  laisse  point  d'y  ietter  ses  yeux.  Ainsi  donc  sachons  que  quand  nous  n'aurons  nul  ordre  exterieur  en  l'Eglise,  il  faut  que  nous  facions  encores  profiter  les  Sacremens  qui  sont  ordonnes.  Comme  voila  le  Baptesme,  qui  est  profane  en  la  papaute,  et  de  fait  comme  avons  nous  este  baptises,  sinon  avec  ces  ordures  que  les  hommes  ont  inventees?  Mais  tant  y  ha,  qu'il  nous  faut  retenir  ce  qui  est  de  Dieu.  Il  faut  que  nous  recevions  le  baptesme  qui  est  fait  en  son  nom,  il  faut  bien  que  nous  renoncions  au  chresme,  et  au  crachat,  au  sel,  aux  chandelles,  et  a  tout  le  reste  qui  y  est  adiouste  par  l'invention  des  hommes,  ou  plustost  de  sathan,  qui  leur  a  mis  toutes  ces  choses  au  cerveau.  25