55:385  385  CAPUT  I.  386  prompta  est  solutio  :  quia  illic  activa  est  verbi  significatio,  quae  hic  passiva  est.  Iacobo  dicitur  probatio  efficere  patientiam  :  quia  nisi  nos  Dominus  examinaret,  sed  re  linqueret  otiosos,  nulla  esset  patientia:  quae  nihil  est  aliud  quam  animi  fortitudo  in  malis  perferendis.  Paulus  vero  intelligit,  dum  patiendo  mala  vincimus,  nos  experiri  quid  Dei  auxilium  in  necessitate  valeat.  Nam  tunc  quasi  in  re  praesenti,  nobis  ostenditur  Dei  veritas.  Ita  fit  ut  plus  spei  in  posterum  concipere  audeamus:  veritas  enim  Dei,  usu  cognita,  plus  apud  nos  fidei  obtinet.  Ideo  Paulus  docet  ex  tali  probatione,  id  est  divinae  gratiae  experimento,  spem  nasci  non  quod  tunc  demum  spes  incipiat,  sed  quia  augescit  et  confirmatur.  Uterque  vero  significat  tribulationem  esse  patientiae  materiam:  caeterum  non  ita  naturaliter  compositi  sunt  hominum  animi,  ut  illis  patientiam  secum  afferat  afflictio.  Sed  Paulus  et  Iacobus  non  tam  in  hominum  naturam,  quam  in  Dei  providentiam  respiciunt:  quasi  fit  ut  fideles  patientiam  ex  aerumnis  discant:  tametsi  impii  magis  inde  ac  magis  ad  insaniam  provocentur:  quemadmodum  Pharaonis  exemplum  ostendit.  4.  Patientia  vero  opus  perfectum.  Quoniam  saepe  in  nobis  se  efferunt  generosi  spiritus,  ac  statim  concidunt:  ideo  constantiam  requirit.  Haec,  inquit,  vera  erit  patientia,  quae  in  finem  usque  durabit.  Nam  opus  hic  pro  effectu  capitur.  Nec  tantum  ut  simus  in  uno  certamine  superiores,  sed  ut  perstemus  tota  vita.  Posset  etiam  perfectio  ista  ad  sincerum  animi  affectum  referri,  ut  sponte  se  homines  ac  non  simulate  Deo  subiiciant:  sed  quia  nomen  operis  additur,  malo  de  constantia  exponere.  Nam  multi  (ut  diximus)  qui  heroicam  initio  magnitudinem  prae  se  ferunt,  paulo  post  fatigantur.  Quare  ad  extremum  perseverare  iubet,  qui  perfecti  esse  volunt  ac  integri.  His  autem  duobus  nominibus  significat  quod  statim  exponit.  Hoc  est,  qui  non  deficiunt  vel  fatiscunt.  Nam  qui  victi  impatientia  franguntur,  eos  paulatim  minui,  et  tandem  prorsus  deficere  necesse  est.  5.  Porro  si  quis  vestrum  destituitur  sapientia,  postulet  a  Deo  qui  dat  omnibus  simpliciter^  nec  exprobrat:  et  dabitur  ei.  6.  Postulet  autem  in  fide,  nihil  haesitans.  Nam  qui  haesitat,  similis  est  fluctui  maris  qui  vento  agitur  et  circumfertur.  7.  Non  ergo  existimet  homo  ille  quod  sit  quidquam  accepturus  a  Domino.  8.  Vir  duplici  animo,  instabilis  est  in  omnibus  viis  suis.  5.  Si  quis  destituitur.  Quoniam  ab  eo  ratio  nostra,  adeoque  sensus  omnes  abhorrent  ut  nos  credamus  beatos  esse  in  malis:  ideo  petendum  esse  a  Domino  praecipit,  ut  hac  sapientia  nos  imbuat.  Nam  sapientiae  nomen,  ad  circumstantiam  prae-  Calvini  opera.  Vol  LV.