6:384  humilitatem  dicitur  Deus  ad  homines  respicere,  relatione  ad  eorum  notitiam  sensumque  habita:  quoniam  tunc  se  illis  patrem  declaret,  suaeque  bonitatis  testimonium  reddat.  Porro  quum  hactenus  sine  fine  et  modo  extulerit  hominis  vires,  nunc  quum  demonstrare  vult,  ut  se  ipsum  ad  Deum  proprio  motu  convertat,  liberius  adhuc  multo,  quam  ante,  apertiusque  impietatem  suam  prodit.  Vult  Deus  impium  converti,  inquit,  non  tamen  sua  omnipotenti  illum  voluntate  convertit,  sed  ut  se  convertat,  invitat  et  adhortatur.  Nostrum  proinde  est  reverti  et  converti,  ipsius  autem,  revertentes  suscipere  et  vivificare.  Quid,  obsecro,  relinquere  hic  Deo  videtur,  praeter  exhortationem?  Et  quid  aliud  in  Pelagio  damnatum  est?  Sed  aliquo  statim  colore  hanc  blasphemiam  tegit:  dum  nec  Deum  nobis  in  conversione  fatetur  deesse,  modo  tamen  priores  ipsi  ad  eandem  conemur.  Est  hoc  quidem  aliquid,  quod  quum  priores  homini  partes  dederit,  posteriores  tandem  Deo  concedat.  Fuit  hoc  secundum  Pelagii  commentum,  postquam  illud  retractare  coactus  fuerat,  hominem  suis  viribus  pervenire  ad  vitam  aeternam  [pag.  211]  posse.  Quanquam  paulo  post  ne  dimidio  quidem  pelagianismo  contentum  se  esse  exprimit.  Nam  quum  vult  definire  qualiter  nos  convertat  Deus,  sua,  inquit,  bonitate  et  patientia,  non  statim  nos  puniens,  sed  dans  tempus  et  locum  poenitentiae:  ad  haec,  multis  mediis  et  occasionibus,  exhortationibus,  beneficiis  et  flagellis  ad  eandem  nos  provocans,  sollicitans,  stimulans.  Hic  vero  totus  et  integer  Pelagius  sua  in  coelum  sacrilegia  evomit.  Externa  enim  tantum  media  ponit,  quibus  invitat  Deus  homines,  atque  his  includit  totam  conversionis  gratiam:  de  interiore  cordis  motu,  de  renovatione  spiritus,  altum  silentium.  Neque  vero  causa  est,  cur  minime  negare  se  tergiversetur,  utcunque  sileat.  Modum  enim,  quo  nos  convertit  Deus,  definiendum  suscipit.  Proinde,  tali  definitione  posita,  totam  cordis  innovationem,  quae  fit  arcana  spiritus  sancti  virtute,  excludit.  Et  tamen,  si  Deo  placet,  ad  tam  clarae  crassaeque  impietatis  confirmationem,  ex  scripturis  suffragationem  aliquam  corrogat.  Quod  se  incipiat  homo  convertere,  inquit,  habetur  apud  Ieremiam:  Si  converteris,  convertam  te  (Ier.  15,  19).  Illic  prophetam  alloquitur  Deus,  qui  ultima  prope  desperatione  tentatus,  secum  multis  querelis  expostulaverat.  Novis  ergo  eum  promissionibus  ad  colligendum  animum  incitat.  Sic  autem  habent  verba,  si  rite  quis  interpretetur:  Si  reversus  fueris,  et  reverti  te  fecero,  ante  faciem  meam  stabis;  si  pretiosum  a  vili  discreveris,  eris  quasi  os  meum.  Quia  successu  destitui  se  videns,  animum  desponderat,  ac  perinde  vacillare  coeperat,  quasi  Dei  promissis  sua  non  constaret  fides,  hanc  haesitationem  et  diffidentiam  reprehendit  Dominus:  postea  tum  ad  fidei  fortitudi-