55:384  curandis  non  mirum  est.  Varie  ergo  nos  Dominus  affligit:  quia  non  eodem  curari  possent  pharmaco,  ambitio,  avaritia,  aemulatio,  gulae  intemperies,  nimius  mundi  amor,  et  innumerae  libidines  quibus  scatemus.  Quum  iubet  existimare  omne  gaudium,  perinde  est  ac  si  diceret,  ita  in  lucro  deputandas  esse,  ut  nonnisi  gaudendi  sit  materia.  Denique  nihil  esse  in  afflictionibus  significat,  quod  gaudium  nostrum  obturbet.  Atque  hoc  modo,  non  tantum  praecipit,  placide  et  aequo  animo  ferre  res  adversas:  sed  causam  esse  docet  cur  gaudeant  fideles,  dum  illis  premuntur.  Certum  quidem  est,  ita  comparatos  esse  omnes  naturae  nostrae  sensus,  ut  nos  dolore  et  tristitia  afficiat  quaevis  tentatio.  Neque  vero  potest  quisquam  nostrum  naturam  eatenus  exuere,  ut  non  doleat  ac  tristetur  simulac  sentit  aliquid  mali:  sed  hoc  non  obstat  quin  assurgant  filii  Dei,  directione  spiritus,  supra  carnis  dolorem.  Hinc  fit  ut  vel  in  media  tristitia  non  desinant  tamen  laetari.  3.  Scientes  quod  probatio.  Nunc  videmus  cur  tentationes  vocaverit  res  adversas:  nempe  quia  fidei  nostrae  examinandae  serviunt.  Est  autem  hic  causae  redditio,  ad  confirmandam  proximam  sententiam.  Poterat  enim  obiici  ex  adverso,  Qui  fieri  potest  ut  quod  amarum  est  sensu,  dulce  iudicemus?  Ab  effectu  ergo  ostendit,  in  afflictionibus  gaudendum  esse,  quia  fructum  pariant  magni  aestimandum:  nempe  patientiam.  Ergo  si  Deus  saluti  nostrae  consulit,  gaudendi  materiam  nobis  praebet.  Eodem  utitur  argumento  Petrus,  circa  initium  prioris  epistolae:  ut  probatio  fidei  vestrae  auro  pretiosior  sit  in  laudem,  ete.  Nam  certe  ideo  et  morbos,  et  inopiam,  et  exilium,  et  carcerem,  et  ignominiam,  et  mortem  horremus,  quia  putamus  mala  esse.  Quum  autem  intelligimus,  Dei  beneficio  verti  in  salutis  adiumenta,  ingratitudinis  esset  obmurmurare,  ac  non  sponte  nos  offerre  illi  adeo  paterne  tractandos.  Paulus  ad  Romanos  cap.  5,  3,  gloriari  dicit,  pro  eo  quod  Iacobus  hic  gaudere.  Gloriamur,  inquit,  in  tribulationibus,  scientes  quod  tribulatio  patientiam  efficit.  Quamquam  videtur  quod  mox  subiicit,  Iacobi  verbis  esse  contrarium.  Probationem  enim  tertio  loco  ponit,  quasi  patientiae  effectum,  quae  hic  prior  ordine  statuitur,  tanquam  causa.  Verum