25:384  (ut  volunt  multi)  sed  angelos  intelligo  quibus  stipatus  erat  Deus,  tanquam  regia  cohorte.  Nam  et  Deus  arcam  locari  voluit  inter  Cherubim,  ut  doceret  sibi  praesto  esse  coelestes  exercitus.  Ideo  apud  Isaiam  (6,  2)  Seraphim  circumdant  eius  solium:  Daniel  (7,  10)  autem  se  vidisse  dicit  decies  mille  myriadas:  illa  multitudine  infinitum  numerum  designans,  sicut  et  Moses  per  decem  millia.  Probabile  autem  est,  ex  hoc  loco  Stephanum  et  Paulum  mutuatos  esse  doctrinam  illam,  legem  ordinatam  fuisse  per  angelos  in  manu  mediatoris  (Act.  7,  53  Gal.  3,  19):  eo  enim  sanctior  legis  autoritas,  quae  tot  habuit  obsignatores.  Statuitur  ad  dexteram  eius  lex,  non  modo  tanquam  sceptrum  vel  insigne  sed  tanquam  potestas  vel  ratio  gubernandi:  neque  enim  tanquam  rex  apparuit  solum,  sed  ostendit  quomodo  praeesse  vellet.  Lex  autem  ignis  vocatur,  ad  iniiciendum  terrorem,  et  omnes  ad  humilitatem  cogendos.  Quanquam  non  displicet,  Mosen  in  hoc  epitheto  alludere  ad  externa  ignis  et  flammae  symbola,  de  quibus  vicesimo  capite  Exodi  loquutus  est.  Quoniam  vero  nomen  DI  quodlibet  statutum  vel  edictum  significat,  quidam  ad  prohibitionem  restringunt,  ne  quis  ad  montem  propius  accederet.  Ego  vero  non  dubito  totam  doctrinam  notari  qua  continetur  Dei  imperium.  3.  Utique  diligit  populos.  Si  de  gentibus  accipere  libeat,  sic  resolvenda  erit  oratio:  Quamvis  diligat  cunctos  mortales,  peculiari  tamen  favore  dignari  sanctos,  ut  eorum  salutem  custodiat:  verum  rectius  exponitur  de  solis  Abrahae  filiis,  quos  ideo  vocat  populos:  quia  ob  multitudinem  in  quam  excreverant  in  tribus  divisi,  poterant  censeri  totidem  gentes.  Quoniam  autem  particula  *)K  prorogationem  significat,  sicut  apud  Latinos  Adhuc,  optime  conveniet  sensus:  Quamvis  in  multas  stirpes  dispersi  sint  Abrahae  posteri,  ut  videri  possint  alienati  ab  una  familia:  Deum  tamen  adhuc  amore  suo  omnes  prosequi,  nec  multiplicem  turbam  obstare  quominus  unum  corpus  ipsos  censeat.  Summa  est,  neque  temporis  progressu,  neque  incrementis  populi,  exstinctam  esse  Dei  gratiam  :  sed  continuam  fore  erga  genus  Abrahae,  quamlibet  longe  lateque  propagatum  fuerit.  Notandum  autem  est,  quod  mox  additur  amoris  signum,  esse  scilicet  in  manu  Dei.  Unde  colligimus,  ex  quo  nos  amplexus  est  Deus  in  gratiam,  certum  fore  salutis  nostrae  custodem:  unde  iterum  nascitur  solidae  et  aeternae  vitae  fiducia.  Mutatio  personae  sensum  non  obscurat,  dum  a  tertia  ad  secundam  transit.  Verum  quia  fidelibus  permisti  erant  multi  hypocritae,  ut  ecclesia  Dei  semper  areae  fuit  similis,  singularem  hanc  Dei  gratiam  privilegio  ad  eos  restringit  Moses,  qui  se  Deo  libenter  subiiciunt,  et  pia  docilitate  amplexantur  eius  doctrinam  :  qua  nota  discernit  inter  genuinos  Dei  filios,  et  spurios  aut  degeneres,  qui  falso  praetexunt  eius  nomen.