8:383  383  QUATRE  SERMONS.  384  veu  qu'il  avoit  moyen  d'eschapper.  Mais  il  nous  convient  plustost  tenir  au  tesmoignage  du  sainct  Esprit,  lequel  loue  sa  constance.  Si  on  ne  fait  point  mal  en  idolatrant  pour  eviter  la  rage  des  Papistes,  celuy  qui  sera  macquereau  de  son  maistre  n'offensera  point.  Un  homme  sera  excuse  quand  il  empoisonnera  son  prochain  ou  qu'il  fera  quelque  trahison  pour  crainte  d'offenser  celuy  auquel  il  est  subiect.  C'est  trop  insiste  sur  cest  article-la  auquel,  comme  i'ay  dict,  il  n'y  a  nulle  difficulte  ne  scrupule.  Mais  il  est  bon  qu'on  veoye  en  quelle  confusion  tombent  ceulx  qui  par  leurs  finesses  cuident  eschapper  du  iugement  de  Dieu.  Il  y  en  a  qui  usent  auiourd'huy  d'une  autre  eschappatoire;  car  en  confessant  que  c'est  une  chose  detestable  de  se  mesler  avec  les  idolatries  des  Payens,  ils  ne  veulent  pas  que  cela  s'estende  aux  superstitions  de  la  Papaulte.  Comme  si  toutes  les  impietez  des  Payens  n'avoyent  pas  este  corruptions  du  vray  service  de  Dieu.  D'ou  est-ce,  ie  vous  prie,  que  Ies  Payens  ont  tire  toutes  leurs  ceremonies,  sinon  des  saincts  Peres?  Le  mal  a  este  qu'ils  ont  abastardi  ce  qui  estoit  bien  institue  de  Dieu.  Tant  y  a  que  toutes  les  abominations  qui  ont  iamais  este  au  monde  ont  eu  ceste  belle  couverture  du  nom  de  Dieu  et  de  religion;  mais  cela  n'a  pas  fait  qu'elles  fussent  pourtant  iustifiees,  ne  que  les  fideles  y  peussent  participer.  Passons  oultre.  Combien  que  i'accorde  a  ceulx  yci  qu'il  y  ait  difference  entre  l'idolatrie  des  Papistes  et  celle  des  Payens  du  temps  passe,  si  est-ce  qu'ils  ne  pourront  pas  nier  que  Dieu  n'ait  aussi  estroictement  defendu  au  peuple  ancien  l'idolatrie  de  Bethel  comme  des  pais  [f.  ll]  estranges.  Quand  les  veaux  sont  dressez  en  Dan  et  en  Bethel,  c'est  soubs  couleur  du  nom  de  Dieu,  voire  de  celuy  qui  a  retire  son  peuple  d'Egypte.  Mais  pource  que  le  service  qui  la  est  establi  repugne  a  la  doctrine  de  la  Loy,  Dieu  condamne  tous  ceulx  qui  s'iront  la  polluer.  Ce  sont  choses  bien  autant  incompatibles,  la  Cene  de  Iesus  Christ  et  la  Messe  papale,  comme  les  sacrifices  de  Moyse  et  de  Ieroboam.  Parquoy,  d'ou  viendra  ceste  dispense,  d'aller  a  la  Messe,  soubs  ombre  que  c'est  un  desguisement  de  la  Cene  de  Iesus  Christ?  Au  contraire,  ie  di  que  ceulx  qui  craignent  vrayement  Dieu  la  doibvent  avoir  en  double  detestation,  puis  qu'elle  profane  plus  ouvertement  la  saincte  ordonnance  du  Fils  de  Dieu,  que  si  elle  n'estoit  pas  dressee  ainsi  a  l'opposite  d'icelle.  Tenons  donc  en  somme  ceste  reigle,  que  toutes  inventions  humaines  qui  sont  dressees  pour  corrompre  la  simple  purete  de  la  parolle  de  Dieu,  et  renverser  le  service  qu'il  demande  et  approuve,  sont  vrais  sacrileges,  ausquels  l'homme  Chrestien  ne  peut  participer  qu'en  blasphemant  Dieu,  c'est  a  dire  en  foulant  son  honneur  aux  pieds.  Ie  scay  combien  ceste  rigueur  semble  dure  et  insupportable