8:382  entendu  de  l'Evangile.  Ils  monstrent  aussi  qu'ils  ne  scavent  que  c'est  de  Iesus  Christ,  ni  de  sa  grace.  Car  quand  il  est  dict  (Ephes.  5,  30)  que  nous  sommes  os  de  ses  os,  et  chair  de  sa  chair,  c'est  bien  pour  monstrer  que  nous  sommes  conioincts  a  luy  et  de  corps  et  d'ame.  Et  pourtant,  on  ne  peut  souiller  son  corps  en  quelque  superstition,  qu'on  ne  se  prive  de  ceste  union  sacree,  par  laquelle  nous  sommes  faicts  membres  du  Fils  de  Dieu.  Que  ces  docteurs  subtils  me  respondent  s'ils  ont  receu  le  baptesme  seulement  en  leurs  ames.  Dieu  n'a-il  pas  ordonne  que  ce  signe  fust  engrave  en  nostre  chair?  Le  corps  doncques,  auquel  la  marque  de  Iesus  Christ  a  este  imprimee,  doibt-il  estre  pollue  aux  abominations  contraires?  La  Cene  se  receoit-elle  seulement  de  l'ame,  et  non  pas  aussi  des  mains  et  de  la  bouche?  Dieu  met  les  armoiries  de  son  Fils  en  nos  corps,  et  nous  les  souillerons  de  fange  et  d'ordure?  Il  n'est  pas  licite  d'imprimer  deux  coings  en  une  piece  d'or,  ou  de  mettre  en  un  instrument  public  deux  seaux  contraires  l'un  sus  l'autre;  et  l'homme  mortel  se  donnera  conge  de  falsifier  le  Baptesme  et  la  saincte  Cene  de  Iesus  Christ,  et  dira  qu'il  n'y  a  nul  mal?  Telles  gens  seroyent  dignes  que  leurs  serviteurs  leur  feissent  accroire  qu'ils  ont  bien  le  cueur  a  les  servir,  en  dormant  et  se  gaudissant,  et  ne  remuant  point  un  seul  doigt  pour  rien  faire.  S'ils  alleguent  que  ce  n'est  pas  tout  un,  d'autant  que  nous  avons  affaire  du  service  de  ceulx  qui  sont  soubs  nous,  ie  respon  :  puis  que  Dieu,  sans  en  avoir  besoing,  nous  veult  employer  a  son  honneur,  que  c'est  une  grand'  honte  qu'en  faisant  tout  au  rebours  nous  vueilhons  estre  quictes  envers  luy;  et  encore  une  plus  grand'  honte  qu'un  ver  de  terre  et  une  charongne  vueille  avoir  plus  de  preeminence  que  son  createur.  Il  fault  encor  parler  plus  grossement  a  telles  bestes.  Ils  disent  qu'il  leur  est  licite  de  se  contrefaire  entre  les  Papistes.  Qui  est-ce  donc  qui  leur  donne  le  pain  qu'ils  mangent  la?  et  qui  est-ce  qui  fait  fructifier  la  terre?  S'ils  ne  peuvent  [f.  10]  nier  que  Dieu  les  nourrisse  la  comme  ailleurs,  pourquoy  feront-ils  hommage  au  diable  de  leurs  corps?  S'ils  estoyent  Chrestiens,  i'userois  de  raisons  plus  haultes,  ascavoir,  en  leur  demandant  pourquoy  c'est  que  nous  vivons  yci-bas.  Mais  c'est  pitie  que  ceulx  qui  veulent  par  leurs  cautelles  se  iouer  avecques  Dieu,  s'abrutissent  tellement  qu'il  les  fault  manier  comme  gens  insensez.  Il  leur  semble  que  c'est  assez  d'avoir  dict  qu'ils  ne  font  rien  en  cest  endroit  que  par  crainte.  Mais  si  ceste  couleur  avoit  lieu,  il  fauldroit  dire  que  Ioseph  n'eust  point  mal  faict  de  paillarder  avec  sa  maistresse,  ne  cerchant  point  sa  volupte,  mais  seulement  pour  ceder  a  la  force  qu'elle  luy  faisoit.  C'eust  donc  este  follement  faict  a  luy  de  tant  souffrir  et  s'exposer  en  tel  diffame,